TURA: First Referral Unit aro Critical Care Unit-rango donatna gita Meghalaya a·dok gimikoniko ge 325 Contractual Staff Nurse-ni kamna candidate-rangko seokanio Garo Hills-na dongimin ge 113 kamrangna sak 58 candidate-rangkosan practical porikkana seokaiaha ine Garo Reservation Policy Coordination Committee (GRPCC), suk ong·gijaniko parakatenba, ia kamna July jani 27 tariko ra·gipa porikkako den·galpilchina aro gital dake candidate-rangko seokpiltaichina Meghalaya Medical Services Recruitment Board-ni Director-ko didiataha.
GRPCC-ni general secretary LC Momin-ni parakatani gitade, First Referral Unit aro Critical Care Unit-rango ja 11-na kamko ka·na gita ge 325 contractual staff nurse-ni kamrangna re·anggipa July 27 tariko written examination ba porikka seaniko ong·atahachim. Gimik ge 325 kamrangoni Garo Hills gimikna ge 113 kamrangkosan chamataiaha aro Garo Hills-o written exam-ko segipa candidate-rangoni sak 58-kosan practical porikkana seokaiaha ine Momin parakataha.
“Practical porikkana seoka man·gipa gimik sak 655 candidate-rangoni A·chik candidate-rangde sak 45-san ong·skaaiaha aro practical porikkani ja·man seoka man·gipa A·chik candidate-rangde iana bateba komiangkugen ine chinga niksamsona man·enga. Uni gimin ia contractual staff nurse-ni kamrangna Meghalaya Medical Services Recruitment Board-ni seokaniara State Reservation Policy gita ong·jaenga aro iako chinga GRPCC raken jegalenga,” ine Momin parakatenba, ia kamna ong·atgipa written examination-ko den·galpilchina aro gital dake kamna seokaniko a·bachengattaichina Meghalaya Medical Services Recruitment Board-ni Director-ko didiataha.
