Ganesh Das Hospital-ni Babies Critical Care Unit-ko kulia
SHILLONG: Shillong Medical College-ko 2025 bilsio aro Tura Medical College-ko 2026 bilsini gisepona a·bachengna gita sorkari krenge kamrangko ka·enga ine Budbar salo, Shillong songjinmani Ganesh Das Government Maternal & Child Health Hospital-o Babies Critical Care Unit (SNCU, NICU aro MNCU)-ko kulie on·angani somoio a·dokni Chief Minister Conrad K Sangma parakataha.
Ganesh Das Govt MCH Hospital-ni Babies Critical Care Unit-ko kulie on·anganio a·dokni Health Minister Ampareen Lyngdoh, Health Department-ni Principal Secretary Sampath Kumar aro dingtang dingtang official-rangba bak ra·angtokaha.
A·dokni pilak health centre aro hospital-rangon an·tangtangko namdapatna gita cholrang donga ine janapatengon, health centre aro hospital-rango dingtanganiko ra·baanide nokrangko rike on·ani ba ma·manti ostrorangko ra·gate on·anisan ong·ja indiba mandeni krenganiosa pangchakbata ine Chief Minister aganaha.
“Manderangna sanna bananirangko on·anio dingtang dingtang neng·nikanirangko chagrongna nanggenchimoba Ganesh Das Hospital-o dingtanganiko nikna man·enganiara namen an·seng baljokani kamrango ka·dongataniko on·ani ong·a,” ine Sangma aganaha.
A·dokni gipin health centre-rango aro hospital-rangoba iandake dingtanganiko nikna ka·oksianiko chu·sokatna man·na gita iandakgipa golporangni gimin gipinrangnaba aganskana nanga ineba Chief Minister aganaha.
Budget-ni 9 percent-mangko an·seng baljokani kamrangna koros ka·enga ine janapatengon, mikkangchiba Ganesh Das Hospital-ko nambatatkuna sorkari pilak nanga dakchakanirangko on·angkugen ine Chief Minister ku·rachakaniko on·angaha.
Iana skang, a·dokni Health Minister Ampareen Lyngdoh-ba jinmana aganprakangengon, saenggipa mande sakanti aro bi·sa sakantian nambatgipa sanna bananirangko man·china aro tangka paisa nogotgrian sanna bananirangko ra·na man·na gita sorkari rakbee kamko ka·enga ine parakataha.
Sanna bananirangko on·enggipa manderangni neng·nikanirangko chel·chakna aro namatna gita sorkari kam ka·enga ineba Lyngdoh parakataha.
