SHILLONG: Meghalaya Legislative Assembly-o Leader of Opposition (LO) ba Opposition dolo dilgipani kamko jako ra·na gita Congress dolo membor-rang chu·ongjahani gimin da·o LO ong·enggipa Congress dolni dilgipa Ronnie V Lyngdoh-ni kam wataniko sengkuenga ine Sukrobar salo, Assembly-ni Speaker Thomas A Sangma parakataha.
Congress dolni MLA sakgittam, chong·motan Umsning-ni MLA Dr Celestine Lyngdoh, Mawhati-ni MLA Charles Marngar aro Nongstoin-ni MLA Gabriel Wahlang, NPP-o napangani ja·man da·o Congress dolo Opposition dolko dilenggipa Ronnie V Lyngdoh saksasan dongaiahani gimin ua LO-ni kamko jako ra·na bil dongjahachim ine nikna man·a.
Indake ong·engon, da·o ong·enggipa LO-na Speaker-ni office-ni gita u·iataniko on·na skang, ua an·tangan kam wate on·aniko ua sengkuenga ine Assembly-ni Speaker parakataha.
LO-ni kamko da·o Trinamool Congress (TMC) man·skagenma ine sing·anina aganchakaniko on·angskaengon, da·o dipet Opposition dolrangoni darangba ia kamna dorgasto galgiparang ba ia kamko bi·e seatgiparang dongkujani ua ia kamni bidingo chanchie ja·kurangko de·na somoirang dongkuenga ine Sangma aganaha.
Koborko on·ani gitade, Leader of Opposition (LO) ba Opposition dolni dilgipa ong·na gita da·o Trinamool Congress (TMC)-na cholrang nambatengahani gimin ia kamko a·dokni gitcham Chief Minister aro TMC-ni dilgipa Dr Mukul Sangma ong·jaode TMC-ni state president Charles Pyngrope man·ani ong·engachim.
2023 bilsini Assembly election-ni ja·man Congress aro TMC dolgnion MLA sakbonga ka·e dongachim aro VPP-o MLA sakbri dongskaachim. Membor-rang chu·ongjagenchimode LO-ni kamko Assembly-o ja·delbatsranggipa membor-na on·rongaiachim aro iako hisapgenchimode ia kamko TMC-ni dilgipa Dr Mukul Sangma-an man·ani ong·achim.
Niam gitade, Opposition dolni dilgipa ong·na gita party-o Assembly-ni bak chikkingoni baksa ong·na gita nangachim aro uan komibeoba sakdok membor-rang dongna gita nanga ong·jaode Assembly-ni Speaker, dal·batgipa opposition dolna on·na bil dongskaachim.
Da·o ong·enggipa LO-na basako Speaker-ni office, u·iataniko on·gen ine sing·skaon, da·o ong·enggipa LO-na u·iataniko on·na nangjana gita ua an·tangan kam wate on·anikosa ua sengkuenga ine Speaker parakataha.
“Da·o ong·enggipa Opposition dolni dilgipa, Assembly-o membor saksasan ong·aiaha ine an·ching pilakan ma·sia, uni gimin uni kamko watchina gita Speaker-ni office, una u·iataniko on·na nanggen. Indake ong·genchimoba, da·o ong·enggipa LO-na u·iataniko on·na nangjana chinga ua an·tangan kam wate on·china chinga sengkuenga,” ine Assembly Speaker aganaha.
