SHILLONG: Meghalaya Legislative Assembly-o Opposition Leader (OL) ba Opposition dolko dilenggipa Congress dolni Ronnie V Lyngdoh, kamtangko wate, ia kamna Trinamool Congress (TMC)-na chakpaaniko on·skaahani gimin Opposition Leader-ni kamna TMC parliamentary party-ni dilgipa Dr Mukul Sangma, Assembly-ni Speaker-na dorgastoko on·eskaaha.
Budbar salo, Assembly Speaker Thomas A Sangma-ni kobor ra·timgiparangna parakatani gitade, Opposition dolko dilenggipa Ronnie V Lyngdoh, kamtangko watna gita una an·tangni chittiko on·eaha aro ia kamko TMC-na on·skana miksonge an·tangni chakpaani chittikoba on·eaha.
Ia jani a·bachengachibara, Congress dolni MLA sakgittam, National People’s Party (NPP)-o napangahani gimin Congress dolo da·o Ronnie V Lyngdoh saksasan dongaiahachim aro uandaken OL-ni kamko jako ra·angkuna gita bilrang dongjahani gimin ua ia kamko watna draatako man·aha.
2023 bilsini Assembly election-ni ja·man Congress dolo sakbonga MLA-rang dongkuengachim indiba Gambegre-ni MLA Saleng A Sangma, Tura-ni gital MP-na seokako man·ani ja·man aro da·o MLA sakgittamba NPP-o napangskaahani gimin Congress dolo Opposition dolni dilgipa Ronnie V Lyngdoh saksaksan dongaiahachim.
Congress dolni bilgriangani ja·man Opposition dolrangni gisepo TMC-o MLA sakbonga donge bang·batgipa opposition party ong·aha aro da·o Opposition Leader-ni kamna Congress dolni MLA-ba TMC-na chakpaaniko on·ahani gimin sakdok MLA-rang ong·e, Assembly-ni gimik sak 60 membor-rangoni 10 percent gapdoangaha.
Indake ong·engon, Opposition Leader-ni kamna TMC parliamentary party-ni dilgipa Dr Mukul Sangma-ni a·kanganiko Assembly-ni Speaker niengkua ine u·iataha.
