TURA: Dolgni agangrikanirangchisa aro bakrime kam ka·anichisa Garo Hills Autonomous District Council (GHADC)-o chagrongna nangenggipa neng·nikanirangko namatna man·gen ine GHADC-ni MDC aro Forest & Environment-ni Executive Member I/c Ashahel D Shira parakatenba, kam dontonge jingjengataniko dontongchina aro kamtangtangko ka·epilchina GHADC-o kam ka·giparangko didiataha.
GHADC-o tangka paisani gita neng·nikanirangko namatna aro Garo Hills-ni manderangna maming neng·nikani gri dangdike on·na GHADC-ni Executive Committee, on·kange kam ka·enga ineba Shira parakataha.
Shira-ni parakatani gitade, GHADC-o tangka paisani gita neng·nikanirangko namatna Executive Committee-ni dilgiparang, chanchibewale kamrangko ka·enga aro kamrangko nambatatna jotton ka·enga.
“Mongsonggipa minister-rangko man·chape chinga Meghalaya sorkari aro ma·mong sorkari baksa iani bidingo agangrikenga aro GHADC-o kam ka·enggiparangna dormaharangko on·na man·na gita gong kror 252 tangkarangko dakchake on·atchina gita Home Affairs Ministry-ni Secretary-naba sedoataha. Ia chanchirimanirang chu·sokgipa ong·enga aro GHADC-o kam ka·giparangni namgnina ian be·en pil·gipa ong·gen ine chinga ka·dongenga,” ine Shira parakataha.
“Tangka paisani gita neng·nikanirangko chagrongna nangengoba da·o GHADC-ko chalaienggipa Executive Committee, Meghalaya High Court-ni ge·etani gitan kam ka·giparangna dormaharangko on·na man·enga. Manderangna name dangdike on·ani aro Garo Hills-o songdongenggipa manderangna maming neng·nikanirangko on·ani gri kam ka·anian chingni mongsonggipa daito ong·enga,” ine MDC parakataha.
GHADC-o kam ka·enggiparangni kam dontonge jingjengatanichi, council-ni kajinarangko man·anio aro dingtang dingtang kamrangko ka·anio nangchakeanirangko man·na nangengaha ine an·tangni suk ong·gijaniko parakatengon, dolgni apsan asonge agangrikanichi aro bakrime kam ka·anichisa iandakgipa neng·nikanirangkode namatna man·gen ine jingjengataniko dontonge kamtangtangona re·bapilchina Non Gazetted Employees Association (NGEA)-ko Shira didiataha.
