SHILLONG: Meghalaya a·doko Jal Jeevan Mission (JJM)-ni kamrangko sorkari name chu·sokatgija tol·gipa report-kosa ma·mong sorkarina on·aha ine a·dokni BJP dol matnangataha.
Ma·mong sorkarina on·gipa JJM-ni report-ko jegalatengon, Meghalaya a·doko bang·a nokdangrangan chi pipe-rangko soke man·kujaengoba JJM-ni report-ode, bang·bata songrangon chi pipe-rangko chu·gimik sale on·a matchotaha ine mesokskaaha ine BJP-ni state vice president Bernard N Marak matnangataha.
“JJM-ni bidingo a·dok sorkarini mesokgipa report kakket ong·ja maina songrangona re·ange nigenchimode bang·bata songrangon kamrang matchotgija dongtokkuenga,” ine Marak aganenba, uni am·sandie niani gita bang·bata songrangon chi pipe-rangko soke man·tokkujaenga ine parakataha.
A·doko JJM-ni kamrangko ka·ani bidingo tol·gipa report-ko on·e a·dok sorkari, boksisrangko man·aha ineba Marak matnangataha.
“JJM-ni kamrangko ka·anio bang·en cha·bokanirang donga gita nikenga. Khasi Hills-o mai ong·enga ukode anga ma·sija indiba Garo Hills-ode bang·bata songni manderangan angna badi ka·aha. Website-niko nigenchimode kamrang 100 percent matchotaha ine mesoka indiba songrangona re·ange nigenchimode nokdangrango chi pipe soke man·gijako, chidikrang donggijaniko aro ringani chirangko man·tokjaengakosa nikna man·a,” ine BJP-ni state vice president parakataha.
Badiaba badiaba songrangode chirangko porikka ra·e nianio chirang ringna namgipa ong·a ine certify ka·aha ine janapatskaengon, “Ia nokdangrang chi pipe-rangko man·kujaenga ong·ode maikai chirangko ringna namgipa ong·a ine certify ka·na man·skaaha?” ine Marak sing·doataha.
JJM-ni kamrango ong·gija dakanirangko uamang ning·tue am·sandiangkugen aro ma·mong sorkari baksana a·dok sorkarina chu·gimik report-rangko on·gen ineba BJP-ni state vice president parakataha.
