New Delhi: Meghalaya sorkari, GST-o gile man·ani baridapaha ine talataha. Media-o GST chimongao komienga ine report ong·ako kakket ong·ja ine sorkari mesokataha.
“A·doko GST gile man·a chu·gimik 16.66% rate baridapako nikna man·aha, (Ian bilsi 2023034-ni ong·a) ine Finance Department aganaha. GST collection, kror 1118 (bilsi 2021-22) oni kror 1723-ona baridapaha, ine Meghalaya Finance Department-ni Joint Secretary parakaha.
Mejaomangmang media-o a·dokni GST-o man·ani komianga ine mesokaha, indiba ua report-ara April 2024 jasani report-san ong·a. Uan chu·gimik gile man·gipa data ong·ja.
Bilsi 2024 April jaoni August jaona Meghalaya, kror 772 GST gilanio man·aha. Apsan bilsion kror 737 man·achim, iako niatgenchimode 5% baridapaha. Northeast ba salgro salaram a·jolni gipin a·dokrang jekai- Assam 7%, Arunachal Pradesh- 8%, Manipur 11%, Mizoram 1%, Nagaland 0%, Sikkim- 16% aro Tripura- 11% ong·a, ian Meghalaya a·dokni komibatgipa percentage-o dongja ine mesoka.
Uandake a·dokni a·paloniko bang·en breani bidingo talatengon, sorkari, iani bidingoba GST-ni share-tang ba man·gnitangkode man·enga. GST-o mingittam component donga- SGST aro CGST- iarang a·doktangni transaction-rango gamna nanggipa ong·a. Aro IGST, ian inter-state transaction-o gamna nanggipa ong·skaa.
Minggipin ian chonchongipa shopkeeper ba dokan dakgiparangna jemangan a·dokni a·paloniko boturangko ra·baenga, uamangna u·ianiko gipatna ja·ku de·ani ong·a.
