TURA: Meghalaya a·doko aro a·song gimikon National People’s Party (NPP)-ko bilakatna gita Garo Hills Autonomous District Council (GHADC)-ni tangka paisarangko jakkalsretenga ine Budbar salo, BJP-ni state vice president aro Tura-ni MDC Bernard N Marak matnangataha.
GHADC-ni Executive Committee (EC)-ko da·o dipet NPP-sa chalaienga aro tangka paisarangko jakkalsretengani a·selan GHADC-ko chu·gimik bon·atsrangna sienga ineba Marak parakataha.
“GHADC-ni tangka paisarangko dingtang dingtang a·dokrango party-tangko bilakbatatna jakkalsretahani a·selan da·alo GHADC-o tangka paisani gita neng·nikanirangko chagrongna nangenga. Ia tangkarangara GHADC-ni ning·o donggipa dingtang dingtang biaprango namroro silroroaniko ra·bana miksonge chame on·gipa tangka paisarangsa ong·achim. GHADC-o NPP-chi dilenggipa Executive Committee-o BJP-ba opposition-o ong·engani gimin GHADC-ko chel·chakaniara BJP-ni daitoba ong·enga,” ine Tura MDC parakataha.
Marak-ni parakatani gitade, ANVC dolrang baksa songgigrikanichi Garo Hills-o namroro silroroaniko ra·bana gita ma·mong sorkari bang·en tangka paisarangko GHADC-na chamatahachim indiba ma·mong sorkarini chamatgipa tangka paisarangoni kror 50-mangkode NPP, an·tangtangni namgninasa jakkalskaahachim.
“Ian NITI AYOG-ni dongimin niamrangko pe·ani ong·aha. ANVC dolrang baksa ma·mong aro a·dok sorkarirang, 2014 bilsio Delhi songgigrike soi ka·grikaha aro ia songgigrikaniara GHADC-ko bilakbatatanian ong·achim. Indiba batanggimin bilsi 10-ni gisepo NPP-chi dilenggipa a·dok sorkari, ia songgigrikaniko nichanggalaha aro ANVC dolrang baksa tom·anirangko ong·atani pal dingtang dingtang project-rangko ra·e katskaaha. Ia tangka paisarang bang·batakon NPP-ni dilgiparang jakkalsretaha,” ine BJP-ni state vice president matnangataha.
Marak-ni parakatani gitade, 2014 bilsio songgigrike ANVC dolrang baksa soi ka·grikani ja·man Garo Hills-o pilakni gitan namroro silroroaniko ra·bana gita gong kror 100.71 tangkarangko GHADC man·soahachim indiba ia tangkarangoni bang·batakon NPP-ni dilgiparang, a·songni dingtang dingtang biaprango party-rangko mangrakbatatna gitasa jakkalsretskaaha.
