AMPATI: Meghalaya a·doko bi·sa sakantian a·gilsakni seng·aniko man·china kamko ka·ani bak gita Bristibar salo, Meghalaya State Legal Services Authority (MSLSA), Shillong-ni Red FM 93.5 aro Education Department baksa nangrime ‘Back-to-School’ campaign-ko South West Garo Hills a·jani Garobadha aro Ampati bazar-rango ong·atangaha.
Poraia dontonggipa bi·sarangko skul watpiltaichina gita South West Garo Hills a·jao songdongenggipa manderangko didina ia program-ko ong·ataha.
Ia program-ko ong·atanio dingtang dingtang official-rang, jinmana aganprakengon, lekka porani gamchatani bidingo agan-talatanirangko on·angenba, dedrangma a·gilsakni seng·aniko on·china gita jolo songdongenggipa manderangko didiangaha.
Poraia dontonggipa bi·sarangko skul watpiltaina dakchakaniko on·enggipa helpline nombor 15100-ni gimin talataniko on·angengon, South West Garo Hills a·jao NIOS registration-na Ampati-ni Springfield School-ko centre dakenga ine official-rang parakataha.
Ia program-ko ong·atani bak gita dingtangmancha quiz competition ba sing·anirangna aganchaksusaanikoba ong·atangaha aro ong·e aganchakna man·gipa manderangna boksisrangkoba on·angaha.
Ia program-o dingtangmancha chrokanichi manderangko an·saoatanirangkoba nikna man·aha.
Ia program-ko ong·atanio bak ra·gipa manderangara, South West Garo Hills a·jani School Education Officer Tapos Marak, Chief Judicial Magisrate, DLSA-ni Secretary Ranee Kharsyntiew, DLSA-ni membor-rang, Red FM 93.5-ni Radio Jockey, OSD Temsu M Sangma aro gipinrang ong·a.
