SHILLONG: Manipur a·doko 2023 bilsini May jaonin so·sojengjeng ong·anirang namchipkujaengani gimin ia so·sojengjeng ong·anirangko namatna gita ta·raken ja·kurangko de·china North East Students Organisation (NESO), a·songni Prime Minister Narendra Modi aro Union Home Minister Amit Shah-na sedoataha.
Manipur a·doko ong·enggipa a·selrangni bidingo maming ku·rangko on·jaengani gimin sing·doatengon, so·sojengjeng ong·aniko namatna gita an·tangan Manipur a·dokona re·ange dingtang dingtang dolrang baksa agangrikchina gitaba NESO, a·songni Prime Minister-ko didiataha.
Manipur a·doko so·sojengjeng ong·aniko namate tom·tomaniko ra·bapilna man·na gita chubata gadangni peace committee-ko songchina gitaba NESO, ma·mong sorkariko didiataha.
“Manipur-o ong·enggipa obostarangni bidingo jrip donganiko bon·atchina aro Manipur a·dokona an·tangan re·ange obostarangko niechina chinga Prime Minister-ko didienga. So·sojengjeng ong·anichi dingtang dingtang jatrang aro mongsongbate me·chik aro bi·sarang neng·nikanirangko chagrongna nangtokengani gimin pilakna nanga gita chel·chakanirangko on·chinaba chinga didienga,” ine a·songni Prime Minister aro Union Home Minister-na sedoatgipa chittio, NESO-ni chairman Samuel B Jyrwa parakataha.
NESO-ni parakatani gitade, Manipur a·doko ong·enggipa obostarangni bidingo a·songni Prime Minister, maming ku·rang on·a dongjaengani a·sel obostarangko namjabatatengachim.
Manipur a·doko ong·enggipa obostarangko champengna bilake dakdilgiparang dongjaengani a·selan so·sojengjeng ong·anirang namchipna man·jaenga aro manderang dukrangko chakna nangtokenga ineba NESO-ni chairman parakataha.
2023 bilsini May jaonin Manipur a·doko so·sojengjeng ong·engani a·sel bang·a janggirang gimana gita nangaha aro manderang an·tangtangni nok-jam, bagan bari aro ma·manti gam-jinrangko gimaatna nangaha ineba NESO parakataha.
Manipur a·dokosan ong·aigija salgro salaramni pilak a·dokrangon tom·tomaniko rakkiangkuna gita NESO an·tangtangko on·kange kam ka·angkugen ineba NESO-ni chairman parakataha.
