TURA: Batanggimin salrango dontonggija mikkarang waanganichi, South Garo Hills a·jani Chokpot jolo donggipa Dareng chibima ditdobae, bang·a songrangon chi banangaha aro bang·a biaprangon a·arangba be·e komibeoba te 16-mangni gita nok-jamrang nosto ka·ako man·na nangaha ine Garo Students Union (GSU) Chokpot regional unit parakataha.
GSU Chokpot regional unit-ni president Jish Sangma-ni u·iatani gitade, Chokpot jolrango chirang bannanichi Silki aro Rambrage songrango komibeoba sak 30-mangni gita manderang neng·nikanirangko chagrongna nangtokaha aro ia jolrango network-rang aro rama jal·langrangba namjani a·sel, bang·a songrangonikon name kobor ra·na man·jaha.
Indake ong·engon, chi banenggipa aro a·arang ruronge neng·nikanirangko chagrongna nangenggipa biaprangona Sonibar salo, GSU Chokpot regional unit-ni membor-rang, Chokpot-ni MLA Sengchim N Sangma, Chokpot-ni BDO JN Sangma aro police official-rang baksa re·angenba, ma·manti cha·ani bosturangko suale on·aha ine u·iataha.
Rama jal·langrang namjani a·sel uamang Chokpot jolni pilak biaprangonade re·ange, dakchakanirangko on·na man·jaha ineba GSU Chokpot regional unit-ni president parakataha.
