Sorkarini scheme-rangko manderangona sokatanian mongsonggipa daito: Bernard

TURA: Songadam nokadamrango donggipa bang·a manderangan ma·mong sorkarini on·enggipa dingtang dingtang scheme-ni namgnirangko man·tokjaengani gimin ia scheme-rangko manderangona sokatanian BJP aro uni mongsonggipa daito ong·enga ine Bristibar salo, Bharatiya Janata Party (BJP)-ni candidate aro Tura-ni MDC Bernard N Marak, Gambegre by-election-o susana gita nomination file ka·angani ja·man jinmana parakataha.
“Election-osan ong·ja indiba pangnan songo noko manderang, ma·mong sorkarini on·atenggipa scheme-rangko man·ama man·ja, anga aro BJP-ni manderang am·sandianirangko dakronga. Mongsongbate chinga BJP-ni ong·ani gimin BJP sorkarini on·atenggipa scheme-rang, manderangona sokama sokja, pangnan uko sandironga. Chingade darangkoba mikkang nie kam ka·na man·ja maina je manderangnan miksonge ma·mong sorkari, iandakgipa scheme-rangko on·ataha, uamang pilakan man·na nangani giminsa chingade ia election-oba kamko ka·enga,” ine Marak aganaha.
Songni nokni manderang, BJP sorkari aro Prime Minister Narendra Modi-ni on·atenggipa scheme-rangni gimin ma·sitoka aro ian ia by-election-o BJP-ko cheatna sienga ineba Marak aganaha.
“Gambegre constituency-ni bang·a songrangon BPL card, ration card, PMAY nok, ringani chi aro uandake manderangni man·na nangchongmotgipa nanganirangko man·tokjaenga. Manderangni nanganirangko ma·mong sorkarionide on·ataha indiba ia nanganirangko a·dok sorkari chu·sokatjaengani giminsa chinga dingtanganiko ra·bana ia by-election-o susaenga aro Gambegre-ni manderang, ia by-election-o BJP-ko seokchongmotgen,” ine BJP candidate aganaha.
Ia by-election-o ua chegenchimode uni skanggipa daitoara mai ong·gen ine sing·anina aganchakaniko on·angskaengon, “Gambegre-osan ong·ja, Garo Hills gimikon angni skanggipa daitode kangal cholgrirangnan ong·gen. Ia sal somoirango kangal cholgrirang sorkarini maming dakchakanirangko man·jae neng·nikanirangko chagrongna nangtokenga. Chatro chatrirang scholarship-rangko man·jaenga, budepa butchumarangba Old Age Pension-ko man·jaenga, MGNREGA-ni kamrangko ka·enggipa manderang tangkarangko man·jaenga aro uandake dingtang dingtang neng·nikanirangko chagrongna nangtokenga. Uni gimin ia by-election-o angni dakgrikanide songni nokni manderangna aro kangal cholgrirangna, uamangni man·gnirangko sokate on·na miksonge dakgrikanian ong·enga,” ine Marak aganaha.
NPP-chi dilenggipa MDA sorkario BJP bak ong·paengoba Garo Hills-o BJP-ni MLA saksaba dongjani a·selsa ma·mong sorkarini scheme-rangko a·dok sorkari ra·sekna jotton ka·enga aro iani giminsa ua ma·mong sorkarini ra·gatgipa pilak scheme-rangkon kangal cholgrirangna sokatna gita Gambegre by-election-o susaenga ineba Marak parakataha.
Jal Jeevan Mission (JJM)-ni kamrang chu·sokjaengani gimin aro bijolini bill-rang nangana bate sokengani giminba ua NPP-chi dilenggipa a·dok sorkariko sing·doangaha.
Ia by-election-o seokako man·genchimode uaba NPP-chi dilenggipa MDA sorkarinan chakaigenma ma dingtang dake re·mikkangskana miksongenga ine sing·on, ma·mongo BJP-ko dilenggiparang maiko nangnika ukon ua dakna nangaigen ine BJP candidate parakataha.