TURA: West Garo Hills a·jani Bhaitbari jolrango donggipa chatro chatrirang, Secondary School Leaving Certificate (SSLC) porikkako sena gita gipin biaprangonasa re·ange sena nangengani a·sel neng·nikanirangko chagrongna nangtokenga ine All Meghalaya Minority Students Union (AMMSU) parakatenba, New Bhaitbari-o donggipa Bhaitbari Higher Secondary School-o SSLC examination centre-ko kulie on·china Meghalaya Board of School Education (MBOSE)-ko didiataha.
Iani bidingo MBOSE-ni Executive Chairman-na sedoatengon, Bhaitbari jolrango donggipa dingtang dingtang songni chatro chatrirang, SSLC porikkako Chokchokia Examination Centre-onasa re·rurae sena nangtokenga aro ian chatro chatrirangna, mongsongbate chatrirangna kenchakna nangani ong·enga aro porikkako sena re·ruraanio koros ong·e neng·nikanirangko man·tokenga ine AMMSU-ni president parakatenba, Bhaitbari Higher Secondary School-o SSLC examination centre-ko kulie on·china didiataha.
“Bhaitbari jolni chatro chatrirang, Chokchokia examination centre-ona re·rurae porikkako sena nangengani a·sel dingtang dingtang neng·nikanirangko chagrongna nangtokenga aro ian chatro chatrirangni porikkako seanio nangchakeaniko ra·baskaenga. Bhaitbari Higher Secondary School-o SSLC examination centre-ko kulianichi chatro chatrirangni dingtang dingtang neng·nikanirangko namatna man·gen aro ian chatro chatrirangko porikka seanio nambate dakna dakchakaniba ong·gen,” ine AMMSU-ni president, MBOSE-ni Executive Chairman-na sedoatgipa chittio janapataha.