SHILLONG: PA Sangma International Medical College-o MBBS poraina ge 64 medical seat-rangko oe on·engon, una dorgasto on·giparang Meghalaya-oni da·o sak 200 batpilengon, uamangni poraianina a·dok sorkari tangka-paisachi dakchakaniko on·gen on·jagen, chanchianiko dakanggen.
USTM-ni chalaigipa PA Sangma International Medical College, Meghalaya quota-ni ning·o ge 64 seat-rangko on·enga, jeon MBBS course-ko porainasienggipa chatro-chatrirang bilsio Tg. lak 4.95-ko tuition fees dake gamna nanggen aro gimikchide Tg. lak 24.75 ong·egen.
Fees bang·e nangani gimin sing·anina aganchakengon, bilsio lak 4.5-de on·tisade bang·kalaha, indiba iani bidingo chief minister ma·sia aro iarangko ua nirokatgen ine Health Minister Ampareen Lyngdoh aganaha.
“USTM-o MBBS course-ko poraina chol man·giparangna a·dok sorkari tangka-paisani gita dakchakaniko on·genma on·jawama, chinga chanchichenggen. Uano poraiana gita dorgasto on·giparang da·o dipet sak 200 batengaha aro bebegita korostangchi poraina inode damde rakgnok,” ua agandapaha.
“Seoka man·giminrang educational institute-ona re·angon bimingna gamna nanggipade dongaia, indiba uakoba basakobade scholarship-chin gapatna man·aiaaro basakoba hostel fees ugitarangkode chatro-chatrirang gamana nanga,” Lyndogh aganaha.
ST aro SC quota-ni bidingo singon, iano state reservation policy-ko ja·rikgen, ge 25 seat-nade sorkarini chu·gimik dakchakgipa ong·gen, bangki seat-rangnade ong·rongbewal normal fee-ni adhako chatro-chatrirang gamna nanggen.
