SHILLONG: Meghalaya a·dokni dingtang dingtang biaprango rikenggipa Eklavya Model Residential School (EMRS)-rangko ta·rake matchotatna sorkari krengenga ine Bristibar salo, a·dokni Education Minister Rakkam A Sangma parakataha.
Iani bidingo kobor ra·timgipa manderang baksa agangrikengon, “A·dokni dingtang dingtang biaprango rikenggipa EMRS-rangko ta·rake matchotatna chinga krenge kamrangko ka·enga aro anga bebera·a da·o bilsisani gisepon an·ching kam matchotako nikna man·gnok,” ine Sangma aganaha.
Education Minister-ni aganani gitade, a·doko rikenggipa dam 38 EMRS-rangoni damgnikode matchotmanaha aro mitamkoba bewalan matchotangengaha.
“Dam 22-oni dam 25 EMRS-rangko a·bachengna man·kujaenga indiba anga ka·donga re·baenggipa salrangode chinga kamrangko ta·raken ka·na man·gnok,” ine ua aganaha.
EMRS-rangko skangde Manipur a·dokni MTDC-sa rikachim indiba da·ode EMRS-rangko rikna gita Meghalaya sorkarina pakwatmanaha ineba Education Minister parakataha.
Mitam EMRS-rangko a·bachengatna man·kujaengani gimin sing·on, EMRS project-rangko man·gipa mitam biaprangode a·arangko ra·anio neng·nikanirangko chagrongna nangenga ine Sangma parakataha.
“Iandakgipa neng·nikanirangko namatchina chinga deputy commissioner-rangko, BDO-rangko aro gipin official-rangko ge·etmanaha maina EMRS-rangnade ministry-onin indin on·gipa a·arangkosa bi·enga indiba Meghalaya a·dokode a·arangara manderangnisa ong·ani gimin indinde man·skajaenga. Ia pilak neng·nikanirangkon namatna gita a·dok sorkari kam ka·enga,” ine Education Minister aganaha.
