TURA: Re·baenggipa November 7 tarikoni 9 tarikona Wangala A·dam Chibragre-o ong·atenggipa 100 Drums Wangala Festival ba dama bol 100-ko doke Wangala maniana tarisogipa ramani bidingo Hundred Drums Wangala Festival Committee (HDWFC)-oni talataniko on·angaha.
Batanggimin changrango ia 100 Drums Wangala manianiko Chibragre-o ong·atanio neng·nikanirangko chagrongna nangahani gimin ia changode ia biapona re·napani aro re·ongkatpilna dingtang dingtang ramarangko tarisoenga ine HDWFC-oni u·iatahachim.
Indake ong·engon, ia Wangala A·damona re·baenggipa pilak garirangan, Rubber Board complex gita re·napbagen aro ia biaponi re·angpilengon, Chibragre Picnic Spot gita ong·gija Veterinary Dairy Farm sambao donggipa NH-51 rama gitasa re·ongkatskagen ine Publicity Committee-ni membor FK Marak u·iataha.
