TURA: Dingtang dingtang award-rangko man·e a·gilsakni dingtang dingtang mingsing minggamako man·enggipa ‘Rapture’ jawilwatko re·anggipa Bristibar saloni a·bachenge, Shillong songjinmani U Soso Tham Auditorium-oba mesokengaha aro ia jawilwatko re·baenggipa November 11 tarikona kingkingan ia apsan biapon mesokanggen.
Ia jawilwatko salantian salo changgittam dake, chong·motan attamni 12:15 baji, attamni 2:40 baji aro attamni 5:15 bajio mesokenga.
Ia jawilwatko, dingtang dingtang award-rangko man·gipa aro jawilwat tarianio mingsing minggamako man·gipa Dominic Megam Sangma tariaha aro ia jawilwatko tarianio Eva Gunme Marak, una dakchakanirangko on·aha.
Ia jawilwatara, walni somoio mikgri ong·e saa donggipa bilsi 10-ni me·a bi·sani golpoko tarigipa jawilwat ong·a aro ia jawilwato ia me·a bi·sa, songo manderangni gimarongani ja·man, mande rim·gittanggiparang, be·enni bakrangko badingenga ine jangbingbanganirangko knasoenba, kene janggi tangachim.
Ia jawilwatko A·chikrangni dakbewal rikbewalo pangchake tariaha aro ia jawilwatko tarianio, Hubert Bals, Visions Sud Est aro Doha Film Institute-ba dakchake on·aha.
Ia jawilwatko tarina korosrangko Dominic Sangma-ni Anna Films, China-ni Xu Jianshang aro Sun Li, India-ni Anu Rangachar, Harsh Agarwal, Aditya Grover aro Stephen Zacharias nangrime dakchakaha.
Ia jawilwatko tarianio Northeast India-ni art-rangko namnikgipa Eva Gunme R Marak-ba mongsonggipa daitoko jako ra·aha.
Ia jawilwatko mesokchengani salo, a·dokni Arts & Culture Minister Paul Lyngdoh-ba dongpae bak ra·angaha aro ia jawilwatna Dominic Sangma-ko mittelpilangaha.
“Ia jawilwatna nie anga namen rasong chaa maina ia jawilwatko nambee tariaha. Meghalaya a·doko namnamgipa jawilwatrangko tariengani gimin da·o jawilwat tarigiparangko ra·dona sorkarini daitoan ong·enga,” ine Lyngdoh aganaha.
