Tura: A·dokni Chife Minister Conrad Sangma BJP-ni agent ong·ja indiba deragata man·gipasa ine BJP-ni Gambegre by-poll candidate, Bernard Marak a·kange aganaha.
Uni agangipa kattarang, re·anggipa salrango TMC-ni Mukul Sangma re·baenggipa salrango ong·atnasienggipa by-poll-na wenmitingo aganprakengon CM-ko saffron party-ni agent aro iana agreba ua MLA ong·jagenchimoba BJP-sa uko a·dokni CM songaha ine agananina aganchakskaaha.
“Mukul Sangma-ni agangipa kattarang ong·ja maina ua Conrad Sangma-ko agent ine chanchia jean ong·ja. Conrad agent ong·ja indiba chingni nokdangni mandean. Conrad Sangma BJP-ni depante chongmot ong·jagenchimoba ua chingni deragata man·gipa depante ong·a. Ua Meghalaya-o Democratic Alliance coalition-ni nirok-simsaktimgipa ong·a jekon namao sason ka·na gita aro an·chingni Prime Minister, Narendra Modi-ni ku·rachakgiminrangoni namgnirangko manderangna on·na gita donatgimin ong·a,” Bernard aganaha.
Gambegre seat-na dakgrikanio candidate-rang aroba a·gipi dilgiparangni gisepo matnanggrikanirangchi ding·ataniko man·enga. NPP, TMC, Congress aro gipin sakgni candidate-rang man·chape BJP-ko onchepenga.
“Angni campaign ka·anirang nangchongmotgipa ong·engon, anga an·tangnan campaign ka·enga aro miksonga gita anga namgniko man·enga. Indioba angni dakgrikani candidate-rang mangmangming ong·ja indiba CM an·tangming, gitcham CM (Mukul Sangma) aro Tura-ni MP (Saleng Sangma) mang baksa ong·a. Anga candidate-rangna bate ia dilgiparangni campaign ka·akosa nikaia uni gimin anga Garo Hills-ni mongsonggipa dilgiparang baksa susaenga,” Tura-ni MDC aganaha.
Constituency-o mairangko nangkuenga ba chu·ongjaenga iarangni bidingo aganengon, Bernard-ni agana gitade chi, indin man·gipa merong, rama-jalang, nokrang, pora-skiani, an·seng-baljokanirangona kingkingan dongkujaenga aro manderangko iani bidingo u·iatanian aro uamangoni chakpaaniko am·anian uni nisan ong·a.
MGNREGA-ni ning·o kamrangko on·enganiko a·dokni on·gipa kam ine NPP-ni a·kanganina, indake bringbrangatgipa a·kanganirangko dakjachina Bernard, NPP-ko aganaha.
“MGNREGS a·dokoni ong·ja indiba ma·mong sorkarionisa jekon BJP dilenga. NPP indake a·kangna gita nangja maina uamang iandakgipa scheme-rangni kosako bil dongja indiba nirokpa·aigipasa. Indake ong·engon, MGNREGS-ni ning·o bosturangna chame on·atgipa tangkarangoni 50%-kode uamangni sokattimgiparangan den·rikenga,” ua matnangaha.
