TURA: South Garo Hills a·jani LP skul damsao head teacher saksa, bilsi 15-na an·tangni kamko ka·chipgija dongenga ine A·chik Conscious Holistically Integrated Krima (ACHIK) dol badi ka·doangaha.
Iani bidingo ACHIK dol, a·dokni Education Minister Rakkam A Sangma-na badi ka·e sedoataha.
ACHIK dolni Education Minister-na badi ka·doangani gitade, South Garo Hills a·jani Bolchu Katonggre LP skulna saksa Poresh Sangma minggipa mandeko head teacher-na seokahachim indiba ua bilsi 15-na kingking kamtangko ka·gija dongenga.
Ia LP skulni head teacher kamtangko ka·gija dongchipengani gimin uni biapo assistant teacher ba dakchakgipa skigipasa pilak kamrangkon ka·na nangenga ineba ACHIK parakataha.
Ia skigipani indita bilsirangna kamtangko ka·gija dongengani a·sel ia skulna aro skulo poraienggipa bi·sarangna namen gimaani ong·engaha ine janapatengon, iani bidingo ta·raken sandirokaniko dakchina, skulko chalaienggiparangni kosako nanga gita ja·kurangko de·china aro skulrango ong·enga obostarangko nirokjringna man·na gita cholrangko ra·gatchina ACHIK dol, a·dokni Education Minister-ko didiataha.
