SHILLONG: Re·anggipa November-ni 13 tariko ong·atanggipa Gambegre by-election-ni result-ko Sonibar salo parakna siengahaon, ia by-election-ko cheani cholrang donga ine Bristibar salo, a·dokni Bharatiya Janata Party (BJP) a·kangataha.
“Anga Gambegre-o aro jinma tom·bimonganirangko ong·atani pilakon campaign ka·aha aro manderang chingni agananirangko knatimna bilongen gisik nangaha. Uni gimin Gambegre by-election-ko chinga cheani cholrang dongenga,” ine a·dokni Cabinet Minister aro BJP-ni MLA AL Hek aganaha.
Gambegre by-election-o BJP, Tura-ni MDC aro a·dokni vice president Bernard N Marak-ko susaatahachim ine nikna man·a.
Ia by-election-o dingtang dingtang political dolrang, tangka paisarangchi vote-rangko salna jotton ka·aha ine election matchotani ja·man, BJP-ni candidate Bernard Marak matnange aganahachim.
“Gipin political dolrangde pilakan Gambegre-o pangchakani donggiparangsa ong·a indiba chinga name dakaha gita nikenga. Je manderangan namroro silroroaniko nangnikenga aro je manderangan ma·mong sorkarini on·enggipa dingtang dingtang namgnirangko man·jaengachim, uamangde pilakan BJP-na pu·onaha,” ine BJP-ni state vice president aro Gambegre by-election-ni BJP candidate Marak aganahachim.
Marak-ni aganani gitade, gipin political dolrangni aro dilgiparangni manderangna tangka paisa sualanirangko video-rangoba niksona man·ahachim indiba ia by-election-o BJP-de tangka paisarangko sualgija namen susaskaahachim.
Indake ong·genchimoba, tangka paisa jakkala aro sorkarini dingtang dingtang cholrangko ia by-election-o jakkalaha ine matnanganirangko NPP-de jegalskaaha.
