SHILLONG: Assam-ni damgni rehabilitation centre-o a·dokoni sakgni chadamberang siani gimin Meghalaya sorkari, mamlako am·sandina ge·etaha.
“Ia a·sel ong·ako mnisal kobor man·a jolan principal secretary-ko maimancha ong·chongmota, iako talna sandianiko dakchina ge·etaha. Report-ko Sombar salode man·gen ine Social Welfare Minister Paul Lyngdoh aganaha.
Meghalaya-oni sakgni chadamberang- Rickelson Jyrwa (Golf Link-oni) aro Meban Syndor (Mawlai Mawtawar-oni)-mangko Better Living Wellness Foundation, Mangaldai, Assam aro Alive Again Foundation, Chandrapur, Hatisila, Guwahati-ni rehabilitation-o sannaniko ra·engachim, uamang tanggitik siaha.
Meghalaya Users Forum (MUF)-ni aganani gita, sianggipa sakgnian Assam-ni dingtang dingtang damgni rehabilitation centre-o sannaniko ra·engachim.
Syndor-ni manggisiko Jorhat-ni Rehabilitation Administration, police-na kobor on·gija, autopsy ba post-mortem ka·gijan mahari-ma·drangna pakwatataha ine MUF aganaha.
Minggipin sianggipa sakgnini ma·a-paa aro guardian-rang MUF-ni ja·ku de·aniko nokdang baksa mamingkoba agangrikchenggija rehabilitation centre-ni kosako mamlako segataha ine aganskaha. Chadamberangni sianio centre-ni gualani dongako uamang jechakaha.
Aro MUF, uamangni badi ka·aniko ra·pilja ong·ode, niamo pangchake ja·ku de·skana ka·mikkenataha.
