SHILLONG: Gambegre by-election-o amako man·anina a·dokni Congress dol, gipin dolrangni tangka paisa sualani baksana gipin a·selrangkoba dos galaha.
Iani bidingo kobor ra·timgipa manderang baksa agangrikengon, Gambegre by-election-o National People’s Party (NPP) chegipa ong·na nangtelachim maina ian uamangni tang·onanganiko mesokanisa ong·gnokchim ine Congress dolni dilgipa Manuel Badwar parakataha.
“Ia by-election-o uamang (NPP) bilakbee susaaha aro tangka paisarangkoba bang·en koros ka·aha. Uasan ong·aigija uamang (NPP), sorkari pilak chol aro scheme-rangkoba ia election-o jakkalaha,” ine Badwar matnange aganaha.
Tura-ni gital MP Saleng A Sangma-ba ia election-o Congress candidate-na campaign ka·na gita somoirangko chu·onga gita man·jaha ineba ua aganaha.
Ia Gambegre by-election-o Trinamool Congress (TMC)-ni gnigipa biapko man·rikahani gimin janapatskaengon, TMC-ni candidate Sadhiarani M Sangma, Gambegre-o baditaba chang susaahani giminsa aro saksa bilakgipa candidate ong·e an·tangni vote-rang dongani giminsa ong·aha ine Congress dolni dilgipa Manuel Badwar parakataha.
Gambegre constituency-ko gimaataniara Congress dolna tang·onanganiko mesokani ong·aha ineba ua ku·rachake aganaha.
“Indake ong·genchimoba a·doko Congress dolna kam ka·enggiparang bilaken dongkuenga aro gipin dolrangoniba bang·en party-o napaha. Chinga party-ko mangrakbatatna gita bilakbee kamrangko ka·na nangenga aro songadam nokadamrangonin party-ko bilakbatatna nangenga,” ine ua aganaha.
Politics-ode pangnan tang·doani aro gisepo tang·onaniba dongaia ineba Badwar aganaha.
