TURA: Itegrated Child Development Service (ICDS)-ni ning·o songsalna dangdike on·enggipa Graduate Anganwadi Worker-rangna promotion on·china gita batanggimin bilsion Minister-na memorandum on·gipako da·alonaba kam ka·gija gonchipengani gimin Social Welfare Minister-na lekka setaia.
Turani saksa social activist Cherian Momin-ni janapatani gita, Graduate Anganwadi Worker-rangna promotion on·china gita da·sikkari June jaon Directorate of Social Welfare-na memorandum-ko on·ahachim. Aro batanggimin bilsi bongana kamrangko ka·enggipa Graduate Anganwadi Workers (AWW)-rangni kamrangko promotion ka·china memorandum-o janapahachim.
Memorandum ong·gipao janapgimin gita tik·tak ong·e kamko ka·jaenga aro batesa neng·nikani ong·skaenga. Lekka-pora gadangko nangani kri gimikko matchotgipa bang·a candidate-rangan uamangna promotion on·anio ru·utatako man·e neng·nikaniko chagrongenga. Uamang, a·dokni me·chik aro bi·sarangni janggi tanganiko nambatatna on·kange kamtangko ka·enga ine Momin aganaha.
Selsela jolo Anganwadi ka·giparang contract dake ka·enga. ICDS Project aro Betasing ICDS Project, merit-o pangchake kamko ka·jaenga. Iara niamko pe·asan ong·aija indiba department-ni chanchie dongiminko ja·rikgijaniba ong·enga, ua aganaha.
Social Welfare Department, lekka-pora chu·onggipa Anganwadi Worker-rangna promotion on·anio ru·utataniara ku·rachakako namrenge ra·aniba ong·a. Unigimin ICDS-ni dongimin-ko chu·sokatchina aro mkol·molaniko seng·gnang niatchina gita Momin mol·molataha.
