SHILLONG: Meghalaya a·doko koela bikotaniko a·bachengpiltaiani bidingo a·dokni Rajya Sabha MP Dr WR Kharlukhi, da·o ong·enggipa Parliament-o ku·rangko on·na sienga.
Iani bidingo kobor ra·timgiparangna talataniko on·angengon, “Meghalaya a·doko koela bikotaniko champengatanichi a·dokni manderang, mongsongbate Jaintia Hills a·jarango bang·a manderangan neng·nikanirangko chagrongna nangtokengani gimin anga Parliament-o iani bidingo ku·rangko on·gen,” ine Kharlukhi parakataha.
Da·o dipet a·doko scientific mining ba science-ni bewalo koelarangko bikotna kamrangko ka·engmiting ine janapatengon, a·doko niam gita koela bikotaniko a·bachengpiltaina siengoba bang·a manderangan, mongsongbate koelarango pangchake janggi tangenggipa manderang, janggi tangani cholrang dongjae neng·nikanirangko chagrongna nangtokengaha ine Kharlukhi aganaha.
“Meghalaya a·doko koela bikotaniko champengatania economy-nasan ong·ja indiba bang·a manderangnan, mongsongbate Jaintia Hills a·jao songdongenggipa manderangna neng·nikanirangko ra·baaha,” ine ua aganaha.
Iani bidingo ua batanggimin somoirangoba changgnina kingking ku·rang on·na jotton ka·ahachim ine janapatengon, “Skanggipaode iako nombor 14-gipao seahachim indiba ianona sokona dongimin somoirang bon·skaaha maina dongimin somoiara kontasasanchim. Gnigipaode iako segatskajaha,” ine a·dokni NPP Rajya Sabha MP aganaha.
“Da·oba anga koela bikotaniko a·bachengpiltaiani bidingo ku·rang on·na miksongenga indiba da·o dipet Parliament session-ko name a·bachengna man·kujaenga. Mijal aro da·alba maiba neng·nikanirang dongani a·selo session-ko dontongatna nangaha,” ine Kharlukhi aganaha.
