Tura: Baljek Airport-o ong·atgipa Me’gong festival-oni noktangona re·pilangmitingo dingtang dingtang a·sel ong·ao sakgittam manderang saknaa man·aha.
Police dolni parakani gita, skanggipa a·sel bike salgipa Duster gariko su·gakaha, jeon bike salgipa saknaaha. Gnigipa a·sel bike salgipaan Alto gariko su·gakaha aro saknaa man·aha. Gittamgipa a·sel gari bolgni chatinggrike gari salgipa saknaa man·aha.
Ta·rake bike aro garirangko salani gimin a·selrang ong·aha ine police dol aganaha.
Me’gong festival-o traffic management ba traffic-ko tom·tome rakkianiara authority-na namen sko saani ong·a. Traffic-ko nirokanio ra·bianirangko chagrongani gimin adita km-ni ramakon manderang konta 6-7 somoirang nangaha. Festival-ni skanggipa salo maming neng·nika gri matchotaha. Indiba Swedish rock band, Europe-ni Sonibar salo stage-o git ring·na sokaon traffic -ni obosta namjaha. Indiba chinga traffic-ko name rakkina jotton ka·aha ine West Garo Hills-ni SP Abraham T Sangma aganaha.
