SHILLONG: Trinamool Congress (TMC)-ni dilgipa Mukul Sangma-ko Congress dolona re·angpilnaba gnang ine jangbingbanganirangko knasoani ja·man a·dokni gitcham Chief Minister-ko National People’s Party (NPP)-ni dilgipa aro a·dokni Education Minister Rakkam A Sangma matnangataha.
“Namgipa aro mikkangchina chanchiani donggipa dilgiparangde maming saloba an·tangni gitcham dolona re·pilrongja aro je dilgiparangan mikkangchina chanchisoani donga, uamangde an·tangtangna gital nokrangkosa rika,” ine Mukul Sangma-ni Congress dolona re·angpilna miksonganirang donga ine jangbingbangenggipa kattarangni gimin sing·anina Rakkam Sangma aganaha.
Meghalaya a·dokni skanggipa Chief Minister Captain Williamson A Sangma-ba APHLC-ona re·angpilaha aro a·dokni gitcham Chief Minister Purno A Sangma-ba Congress-ko watbaani ja·man re·angpiljaha ine janapatengon, Mukul Sangma-ba TMC-ni bimango an·tangni nok dongmanaha ine Rakkam parakataha.
Congress doloni ong·kate TMC-o napani ja·man uamangni neng·nikanirangko namatna man·ahama ine sing·anina aganchakaniko on·angengon, “Uamang (TMC) Gambegre-o bilaken susaaha aro Congress-ko gittamgipa biapona ra·onataha,” ine NPP-ni dilgipa aganaha.
Tura-ni gital MP Saleng Sangma da·o Garo Hills-o bilakbaenggipa dilgipa ong·engama ine sing·anina aganchakaniko on·angskaengon, Mukul Sangma-kode PA Sangma sagisa tariahani gimin una bate bilakbatna man·jawa ine Rakkam aganskaaha.
Gambegre by-election-o Saleng Sangma an·tangan amako man·aha maina Tura Lok Sabha election-de dingtang golposa ong·aia ineba ua aganaha.