SHILLONG: Meghalaya a·dokni dingtang dingtang biaprango kam ka·enggipa Anganwadi worker aro helper-rang, an·tangtangni dormaharangko somoi gita man·rongjani a·sel neng·nikanirangko chagrongna nangengani gimin dormaharangko somoi gita on·na a·dok sorkari, ja·kurangko de·chakataha.
Adita salrangna skang Anganwadi worker-rang, Social Welfare department-ni Commissioner aro Principal Secretary Sampath Kumar-ko gronge, dormaharangko somoi gita man·rongjani gimin badi ka·doangani ja·man Anganwadi worker aro helper-rangna somoi gita dormaharangko on·na sorkari ja·kurangko de·chakataha.
Anganwadi worker-rangni badi ka·anirangko man·soahani gimin Social Welfare department-ni Principal Secretary, iani bidingo name am·sandichina department-ni Joint Secretary-ko ge·etangaha aro am·sandianirangko dakon, dongimin niamrango pangchake, Anganwadi worker aro helper-rangni honorarium-ko ia 2024 bilsini December jaona kingkingan dingtang dingtang Child Development Project Office (CDPO)-rangona chamatmanaha ine ma·sina man·aha.
2024-2025 financial year-ni bangki jarangnaba Finance department, tangka paisarangko Social Welfare department-na watatmanaha aro ia tangkarangko December jani skanggipa antion CDPO-rangona sokatna jotton ka·enga ine u·iataha.
Anganwadi worker aro helper-rangni dormaharangko jaantian 7-gipa tarikni gisepon sualatchina gita a·dokni Chief Minister-ba ge·etaniko on·angahani gimin jaantian dormaha on·aniko department-ni Joint Secretary, jani 8-gipa tariko nipilanggen aro sorkarina report-ko on·jringgen.
