SHILLONG: Captain Williamson Sangma State University-ko chalaiani bidingo bon·kame UGC-ni ra·chakaniko man·aha.
University-ni Registrar-na UGC-ni seatgipa chittio janpa je UGC act-ni Section 2 (f)-o University-rangko songanio pangchake Captain Williamson Sangma State University-ni bimingko list-o napataha.
Indake ong·engon University-na adita ja·rikna nanggni ge·etanirangkoba UGC on·ataha. Uarangoni mingsade University, UGC Act 1956-ni under section 22-o pangchake UGC-ni u·iata gita an·tangni department-rang gita aro uamangni bakrimgipa college-rang gita course-rangko ra·e degree-rangko on·na man·gen.
Indake ong·genchimoba professional, technical aro medical programrangko a·bachengatnade Regulatory Councils/Commissions-ni ra·chakaniko man·na nanggen.
Indakeba janapaha je, UGC-ni u·iatgipa degree-rangkosan University on·na man·aigen. University, UGC-ni Notification on Specification of Degrees 2014 aro uni taridapgimin niamrangko ja·rikna nanggen aro Section 22 of the UGC Act, 1956-o janapgiminko ja·rike dakna nanggen.
Act-o janapgimin gita uamangna bil on·gimin biaposan University-ko chalaina man·gen uni a·palode man·jawa. Uamangna bil on·gimin biapona agrede University, mamingdakeba off-campus centre dongna nangjawa.
