SHILLONG: Autonomous District Council (ADC)-rangni election-ko a·dok sorkari, re·baenggipa 2025 bilsini February bon·angachibara, ong·jaode March jani skanggipa antio ong·atnaba gnang.
Kobor on·ani gitade, district council election-ko ong·atanio, a·dokni board porikkarang baksa apsan ong·jana gita sorkari, tarikrangko niengkua.
Khasi Hills Autonomous District Council (KHADC) aro Jaintia Hills Autonomous District Council (JHADC) election-kode ia bilsini gisepon ong·atani ong·ahachim indiba constituency-rangko gital dake sualpiltaiahani gimin ia district council damgnini term-kon jadokna ra·dodapatahachim.
KHADC (Constitution of District Council) (Amendment) Rules, 2024, aro JHADC (Constitution of District Council) Amendment Bill, 2024-ko a·dokni Governor CH Vijayashankhar ra·chakangani ja·man KHADC aro JHADC-ni election-ko ong·atna skang, constituency-rangko sualpiltaina a·bachengataha aro uandaken da·o ia district council damgnio susana sienggipa candidate-rang, sualtaigimin gital constituency-rangoni susana tarisamsotokskaengaha.
Ia district council election-o susana gita dingtang dingtang political dolrang, batanggimin sal somoirangonin tarisamsona gita a·bachengtokaha aro KHADC, JHADC election-o susana gita Voice of the People’s Party (VPP)-an candidate-rangko parakchenggipa ong·aha.
Ia district council election-o susana gita National People’s Party (NPP)-ba, re·anggipa Sukrobar salon, sak 47 candidate-rangko parakatmanaha. Ia sak 47 candidate-rangoni sak 18-de KHADC election-na aro sak 29-de JHADC election-na ong·enga.
Apsan daken, Khun Hynniewtrep National Awakening Movement (KHNAM) dolba, KHADC election-o susana gita sakchet candidate-rangko biming mingaha.
Da·o dipet, United Democratic Party (UDP), Hill State People’s Democratic Party (HSPDP), Bharatiya Janata Party (BJP), Trinamool Congress aro Congress dolrangde, ia district council election-rangna candidate-rangko parakskakujaenga.
