SHILLONG: Autonomous District Council (ADC)-rangni election-ko ong·atna skangan National People’s Party (NPP), an·tangtangni ama man·aniko ku·rachakaha ine Voice of the People’s Party (VPP) parakataha.
District council election-o chee Executive Council (EC)-ko rikna sienggipa dolrang, a·dok sorkariko chalaienggipa dolni bakrimani gride bang·e tangbangjawa ine adita salrangna skangsan NPP-ni dilgipa aro a·dokni Cabinet Minister Ampareen Lyngdoh aganahachim ine nikna man·a.
Uni iandake agangipa kattarangna aganchakaniko on·angskaengon, “Uamangni (NPP) kattarangara election-o susana ka·donggijaniko mesokanisa ong·engaha aro ian uamangni election-na skangan ama man·aniko ku·rachakani gitaba ong·a. Uni gimin ia minister, VPP-ko warachakna gita iandakgipa silchidareko jakkalskana miksongahakon,” ine VPP-ni ku·wattimgipa Batskhem Myrboh aganaha.
Lyngdoh-ni agangipa kattarangara, NPP-ni election-o susana kenaniko mesokani gitaba ong·enga ineba ua aganaha.
“Ian ka·mikkenatachi pu·ongiparangko drae salna jotton ka·aniba ong·a,” ine Myrboh aganaha.
“Election-rango manderangni namnike seokaniko pangnan mande ra·na nanga indiba iandakgipa kattarangko agananichi ua an·tangni ma·sigijaniko mesokani ong·enga,” ine VPP-ni ku·wattimgipa aganaha.
District council election-o chee Executive Council (EC)-ko rikna sienggipa dolrang, a·dok sorkariko chalaienggipa dolni bakrimani gride bang·e tangbangjawa ine aganahani gimin Congress dolba NPP-ko matnangatahachim ine nikna man·a.
“Ampareen Lyngdoh-ni agangipa kattarangara, district council-o ‘autonomous’ ba jakgitel ong·a ingipa kattakon bilgriatani ong·aha,” ine a·doko Congress dolni saksakamkam MLA Ronnie V Lyngdoh aganahachim.
NPP dilgipani agangipa kattarangko jegalatengon, “Autonomous district council-rang, tangka paisarangna a·dok sorkariosa pangchakna nangenga ine ua (Ampareen) aganenga ong·ode district council-rang jakgitele chalaigipa bimangan ong·jawaha. District council-de maming dakeba a·dok sorkario pangchakgipa ong·ja maina dingtang dingtang a·ningni bosturang baksana transport-ni kajinaoniko man·enggipa tangka paisarangko a·dok sorkari, district council-rangna sualtenan nanggipasa ong·a,” ine Congress MLA Ronnie V Lyngdoh aganaha.
Mikkang bilsio ong·atna sienggipa KHADC aro JHADC election-o Voice of the People’s Party (VPP)-ni dilgiparang chegopna ka·dongsotokengani gimin NPP-ni dakchakani gride darang dolan district council-o Executive Council-ko chalaina man·jawa ine NPP-ni dilgipa Ampareen Lyngdoh aganahachim.
“Ia sal somoirango pilakan ding·chaoatako man·tokenga gita nika indiba somoi sokahaosa an·ching obostarangko ma·sigen. MDA-o da·o bilsi gittam somoi dongkuengani gimin darangba chingko mikchepna man·jawa. District council election-o sawa chea uade maming ong·ja indiba na·a sorkariko chalaienggipa party baksa apsan bakrimjaenga ong·ode Executive Council-ko chalaianio bang·e tangbangjawa,” ine Lyngdoh aganahachim.
 |
ReplyForward
|
