TURA: Re·anggipa December 10 tarik walni 11:30 bajimango, Garoland State Movement Committee (GSMC) aro Zikku Balgra-ni dilenggipa Garo Students Union (GSU)-ni membor-rang, niam gri bol salgipa garirangko nirok sandienba, South West Garo Hills a·jani Damalgre aro Rerapara Reserve-oni re·ongkatangengmiting somoio niam gri bol salangenggipa gari bolsako rim·rikna man·aha.
Ia buring bolgrimrangoniko walantian Garo Hills aro Assam-oni niam gri bol badingenggipa manderang, niam gri bolrangko salangenga ine songni manderang badi ka·ani ja·man, GSMC aro GSU-ni membor-rang, walni somoio nirikkianiko dakenba, ia bol salangenggipa gariko rim·rikna man·aha.
“Ia Reserve-oniko niam gri bol ratenga ine chinga jolo songdongenggipa manderangni u·iataniko man·soenba, GSMC-ni membor-rang baksa nangrime, ia jolrango nirikkina a·bachengaha. Mongolbar walni 11:30 bajimango chinga ratgimin bol baksa aro number plate donggijagipa gari bolsako rim·na man·aha. Ja·mano chinga ia bolrangko aro garirangko Tura Range-na pakwate on·ataha,” ine GSU-ni membor Gamgam Sangma parakataha.
GSU membor-ni parakatani gitade, uamangni rim·rikgipa garini ki·sangoba gari bolgni dongachim indiba uamangni skanggipa gariko rim·miting somoion ia gari bolgni, ua biaponi sale katna man·aha.
Iani bidingo NGO-rang, Tura Range office-o FIR-koba ka·aha.
Iana salsa skangsan, West Garo Hills a·jani Phersakandi songo, niam gri bol salangenggipa gariko police-rangni rikangengmiting somoio songni manderang, police-rangni gariko chadrapenba, gariko nosto ka·e galahachim.
Koborko on·ani gitade, ia a·sel ong·anioba niam gri bol salangenggipa gario number plate dongjachim.
