TURA: Bristibar salo, Hyderabad-o donggipa ICAR-Indian Institute of Millet Research-ni dakchakanichi Central Agricultural University (Imphal)-ni College of Community Science (CCS)-ni ning·o donggipa MTTC&VTC-ni gita ‘Line Sowing of Foxtail millet and Great Millet in Garo Hills of Meghalaya’ ine pangchakaniko donenba farmer field school-ko West Garo Hills a·jani Jijikapara songo ong·atangaha.
Ia program-ko ong·atanio, College of Community Science (CCS)-ni ning·o donggipa MTTC&VTC-ni Assistant Professor Dr Sabyasachi Majumdar, songni nokni manderangna, misirangko gama ge·anio a·salrangko jakkalani bidingo agan-skie on·angaha.
Ia program-ko ong·atanio, Jijikapara songoni gimik sak 32 game ge·e cha·giparang bak ra·angtokaha aro uamangna ia program-o misi ge·anio jakkalgipa a·salrang aro komila chararangkoba suale on·angjolaha.
