SHILLONG: Sin·kari sokbaahaon, a·dokni dingtang dingtang biaprango festival ba manianirangko bang·en nikna gita man·engaha aro uandaken da·o a·doko bongagipa Winter Tales Festival ba manianikoba nikna man·taiengaha. Ia manianiko December 12-oni 14-ona ong·atangengon, iako Bristibar salo, a·dokni Tourism Minister Paul Lyngdoh, Shillong songjinmani Ward’s Lake-o oprake on·angaha.
Manianio bang·bea manderang bak ra·engon, ia manianiara jatni jakgitele a·doko ring·a-sala, changa-sapa, pattigimin nitoatgipa gunchi katchaan baksa, re·anggimin bilsio manianina bate sol·na-repna changgipa, sikna-kona changgipa, aro badingchiwale cha·giparang, a·dokni dam 12 district-rangoni bakko ra·e jatni ku·cholsan ong·ako nike katchaaniko man·a ine ia Winter Tales festival-ko a·bachengatanio a·dokni Tourism Minister Paul Lyngdoh, mittele aganangaha.
Ia manianiko ong·atanio, samtangtango donggipa sam-bolrang, do·o-matrangko saknaatgija, jeng-jabolrangko skatang galpripragija aro plastic jakkalaniko champengna ja·ku de·aninaba a·doko songdongenggiparangna u·idapatani ba gipatani ong·a.
Manianio bak ra·giparang jatni cha·a-ringa, doka-dam·ani, aro wata-chenganirangko nike dingtang-dingtang u·i-ma·sidapaniko man·gen.
Ia Tourism-ko namdapate a·dokni gam-jinko tang·doatasan ong·aija, indiba pattigiminko simsake jakkalaniba ong·an baksa a·dokko namdapatanina samtangtango donggiparangko ripinganiba ong·a ine Lyngdoh agankuaha.
Re·baenggipa February jao dal·begipa Tourist Festival jekon Gujarat-o ong·atna sienga ua manianio Meghalaya a·dok Tourism-ko namdapatna ba niksengatna bakko ra·anggen ineba ua parakataha.
