SHILLONG: Mikkang bilsi February jao ong·atnasienggipa District Council poll-rangna, Congress uamangni skanggipa list-o sak 26 candidate-rangni bimingrangko mejalo mingparakataha.
Party-ni koboro gita KHADC Deputy CEM Pynshngainlang N Syiem, da·o je biapon ong·engachim, ua apsan Mawkhar-Pynthorumkhrah constituency-onin susataina tarienga.
Unomitingo, da·o Mylliem-o MDC ong·enggipa Ronnie V Lyngdoh-de susana miksongjahani gimin, uni biapo Banphiralang Basaiawmoit-ko mingskaaha.
Party-ni koboro parakatani gitade, sak 15 candidate-rangko Khasi Hills Autonomous District Council election-o susaatna seokaha, jeon saksa 11 candidate-rangko Jaintia Hills Autonomous District Council poll-o susaatna gita seokaha, je candidate-rangni bimingrangkon Block Congress Committees (BCC), District Congress Committees (DCC), aro Pradesh Election Committee (PEC) nangrime chanchianiko dakenba ra·chakman·ahachim.
Meghalaya Pradesh Congress Committee (MPCC)-ni koboro janapani gitade uamangni da·o seokgimin candidate-rangara, mikkang gitalrang, lekka-bida gnanggiparang aro uamangni kamrangko ba daitotangko jako ra·na skie ra·giminrang aro changgiminrang ong·a.
‘‘Congress party, Sixth Scheduled-ko aroba Tribal-rangni bil-rengsiko chel·chak-ripingna krengchakgipa ong·ani gimin, Party-o ka·dongchakaniko donchina aro uamangni candidate-rangna vote on·china gitaba MPCC, Khasi Hills aro Jaintia Hills-ni voter-rangko mol·molaha. Meghalaya-ni manderango chinga ka·donga je uamang Congress-kon basegen aro jedakode a·dolna silroro-namrorogniko aro manderangna kakkel bichalko ra·bana gita chingni miksonganiko be·en pil·atna cholko man·gen,” MPCC talataha.
