SHILLONG: Krismasko maniani bak gita Meghalaya a·dokni Governor CH Vijayashankar, Shillong songjinmani mongsonggipa gilja nok dambriona re·angenba, manderangna Krismasni namgipa skanirangko on·angaha.
Governor-ni re·anggipa gilja nokrangara, All Saints Cathedral, Cathedral of Mary Help of Christians, Jaiaw Presbyterian Church, aro Garo Baptist Church ong·a aro ia gilja nokrangona re·anganio ua, Kristianrangni olakkiani aro bi·anirangoba bak ra·angpaaha.
Ia gilja nokrangona re·anganio ua mondolini dilgiparangkoba gronge, uamangni nangani aro neng·nikanrangko ma·sie ra·na gita agan-golpogrikangjolaha.
Ia mondolirangko grongeanio a·dokni Governor, jinmana aganprakangengon, Krismas ba Jisu Kristoni atchiani salara, a·gilsak gimikon tom·tomani, ka·sagrikani aro meli-nangrimani ong·china ine an·tangni skaniko parakangaha.
Songsalo tom·tomani aro meli-nangrimaniko ra·bana gita toromchi kamrangko ka·engani gimin ua dingtangmancha dingtang dingtang Kristian Mondolirangko mittelpilangjolaha.
Bon·kame ua, Meghalaya a·dokni manderangna Krismas aro bilsi gitalni nama sikaniko on·e, sakantian gisiksan ong·e namgipa miksongani gnang 2025 bilsiko nichaksogiparangba ong·na ineba ku·pattianiko on·aha.
