SHILLONG: Assam-Meghalaya boundary-ni bidingo gnigipa phase-na Assam sorkari baksa agan-golpogrikaniko dakaniko Assam sorkari gisiko nangjaenga. Indake ong·engon, sima tik ka·na man·kugijagipa biaprangko tik ka·srangna gita Assam sorkari gisik nangjaengani gimin, Meghalaya sorkari dingtanggipa cholrangko ra·skachina ine BJP ku·pattianiko on·skaaha.
BJP-ni spokesperson M Kharkrang-ni aganani gitade, Assam darangniba ong·kugijagipa biapko an·tangtangna a·kange ra·aha aro indake uamang da·o ua biapni bidingo Meghalaya sorkari baksa golpogrikaniko dakna gita nangnikjaengaha. Aro ua biapko an·tangtangan ra·manaha ong·ode maini gimin uamang golpogrikna nangnikgen? Una agreba, Assam sorkari ua biaprango nangchongmmotgipa kamrangkoba a·bachengatenga ineba ua agandapkuaha. Indake ua biaprangni bidingo Meghalaya sorkarian dingtanggipa cholrangko ra·skae, Assam sorkari baksa golpogrikaniko dakjaode, Assam ia biaprangni gimin agan-golpogrikaniko dal·e ra·jawaha ineba ua aganaha.
Una agreba Kharkrang uni agananio indakeba janapaha je, skanggipa phase-na agan-golpogrikanio ge 6 biaprango sima-arirangko tik ka·na man·ahachim maina uno Assam, bang·gijasan uamangni dabianiko on·a gita man·aiahachim aro golpogrikanio maming neng·nikani dongjachim. Skanggipa changna golpogrikanio dolgnian gisiko nange skanggipa phase-ko matchotatna man·ahaoba gnigipa changna golpogrikani bon·chongdikatako man·enga. Indake Assam regional committee-rang baksa ua biapko nie uano songdongengipa manderangoniko sing·sandie ra·na gitaba nangnikjaha, uani a·selsa kam ka·anirang bon·chongdike dongenga.
