SHILLONG: India a·songni Kashmir aro Sikkim gita dakgipa a·briarigipa a·dokrango rel ramarangko man·tokahaoba, Meghalaya a·doko, mongsongbate Khasi, Jaintia aro Ri Bhoi a·jarangonade dingtang dingtang dolrangni jegalengani a·sel da·onan rel ramarangko taribana miksonganirang chu·sokgipa ong·na man·kujaenga.
Northeast Frontier Railway (NFR) CPRO-ni kobor ra·timgipana parakatani gitade, Tetelia-Byrnihat railway project-ko skangonin tarina miksonganirang donggenchimoba, dingtang dingtang dolrangni jegalani a·sel chu·sokgipa ong·na man·chipkujaenga aro da·o a·dok sorkarioniba permission-rangko on·kujaengani gimin kamrangko a·bachengatna man·chipkujaenga.
Tetelia-Byrnihat railway project-ni km 2.5 ong·gipa rel ramarangde, Meghalaya a·dokni ning·on ga·akachim ine nikna man·a.
A·dokona niam gri napsrukanirangna kenchake rel garirangko jegalsoenggipa dingtang dingtang dolrang baksa NFR agangrikna miksonganirang dongama ine sing·anina aganchakaniko on·angengon, iani bidingo baditaba chang a·dok aro ma·mong sorkari baksaba agangrikahachim indiba da·alonan chu·sokgipa ong·na man·chipkujaenga ine NFR-ni CPRO parakataha.
Meghalaya a·dokona, mongsongbate Khasi-Jaintia Hills jolrangona rel garirangko ra·bagenchimode, niam gri napsrukanirang bilongbatgnok ine kenchakenba dingtang dingtang dolrang, rel gari ra·baaniko raken jegaltokengachim ine nikna man·a.
Indake ong·genchimoba, Garo Hills-ni Mendipathar-onade rel garirangko ra·baahachim aro rel garirangko ra·baanichi songni nokni manderang namgnirangko man·tokengoba, niam gri napsrukanirang batengama batjaenga, ukode name ma·siskakujaengachim.
Meghalaya a·dokni railway project-rangko den·galpilna miksonganirangde dongkuja ine talataniko on·angskaengon, a·dok sorkarini permission-ko man·genchimosa ia railway project-rangde chu·sokgipa ong·na man·aigen ine NFR-ni CPRO parakataha.
