SHILLONG: Meghalaya a·doko sak 85,000-na batgipa labour ba hajira kam ka·e cha·enggipa manderangni namgnina a·dokni Cabinet, minimum wage ba onbatgipa hajirako bariatna ra·chakangaha.
Labour-rangni hajirako bariatna tik ka·ani gimin kobor ra·timgiparangna talate on·angengon, Unskilled labour-rangna salprako gong 419-oniko gong 525-ona, semi-skilled labour-rangna gong 474-oniko gong 565-ona, skilled labour-rangna salo gong 530-oniko gong 605-ona aro highly skilled labour-rangna salo gong 586-oniko gong 654-ona hajirako bariatna tik ka·aha ine a·dokni Chief Minister Conrad K Sangma parakataha.
Ia gital hajirako pilak dolrangan ja·rikna nanggen ine talataniko on·angengon, ia niamko ja·rikjagenchimode, Labour department-na badi ka·na gita man·gen ine Chief Minister u·iataha.
Indake ong·engon, Meghalaya Buildings and Other Construction Workers Regulation and Employment Condition Rules, 2008 Amendment-koba ia salo Cabinet ra·chakangaha ine Chief Minister parakataha.
“Na·simang pilak ma·sia chinga kajinarang ra·enga aro ia kajinarangko biming segatgimin sak 80,000 ba 85,000 labour-rangni namgnina jakkalenga. Ia namgnirangara, sanna banani grorangko chotani, be·enni gita cholgri ong·giparangna dakchakani aro skul/college-rango poraienggipa bi·sarangna dakchake on·ani ong·a. Ia niamko taridapanichi biming segatgimin labour aro uamangni nokdangrangna on·enggipa namgnirangko bariataha,” ine Chief Minister aganaha.
