PHULBARI: West Garo Hills a·jani Rajabala constituency-ni ning·o donggipa dingtang dingtang biaprango niam gri ro·ong quarry aro ro·ong jetgipa karkanarangko chalaienga ine songbadrango parakatani ja·man, ia biaprango niam gri chalaienggipa quarry-rangko aro ro·ong jetani karkanarangko chipna gita State Forest department-ni official-rang, ta·raken ja·kurangko de·aha.
West Garo Hills a·jao niam gri ro·ong quarry chalaianiko champengatmanahaoba, West Garo Hills a·jani Rajabala constituency ning·o donggipa Balujhora aro Malijhora jolrango bang·en ro·ong quarry chalaianirangko nikna man·kuengachim.
Koborko on·ani gitade, ia song damgniona re·ange nion, komibeoba dam 40 ro·ong quarry-rangko nikna man·aha aro ia ro·ong quarry-rangara mongsongbate, Balujhora, Malijhora, Babilgre, Tombagre, Katolbari, Pearadanga aro Goalgaon songrango ong·achim.
Ia jolrango niam gri ro·ong quarry-rangko chalaiengan baksana damsni ro·ong jetgipa karkanarangko maming licence gri chalaienga ine kobor on·timgiparang u·iatahachim.
Ia quarry-rangoni sal-wal komibeoba bol 1000 garirang, ro·ongrangko salruraenga aro ia quarry-rango ro·ongrangko bikotna gita maming licence gri dynamite-rangkoba jakkalenga ineba koborko on·aha.
Iani bidingo songbadrango seatani ja·man, January-ni 9 aro 10 tarikrangon, Assistant Conservator of Forest (ACF)-ni dilanichi, state forest department-ni manderang, niam gri chalaienggipa quarry-rang aro crusher-rangona re·ange am·sandianirangko dakangaha.
Ia biaprangona re·ange am·sandion, ia biaprango dam 12-mangni gita quarry-rangko chalaienga aro ia quarry-rangni apalaniara 500 square feet-mang ong·a ine forest official-rang nikna man·aha.
“Department-ni gita am·sandion, ia quarry-rango turi aro uandakgipa bosturangchisa ro·ongrangko bikotenga ine nikna man·aha aro ia jolo niam gri chalaienggipa damgittam crusher-rangba da·o kam ka·jaengaha,” ine Forest department-oni u·iataha.
Ia quarry aro crusher-rangko chipchina gita department, skangon u·iataniko on·manaha aro songbadrango seani ja·manba ia quarry-rangna u·iatanirangko on·taiaha ineba department-oni u·iataha.
Department-ni u·iatani gitade, salprakon bol 1000 garirang quarry-oniko salruraenga ine matnanggipani bidingo am·sandion, ian kakket ong·ja ine ma·sina man·aha.
“Ia jolrango pangnan Forest department-ni official-rang, re·rurae nirok sandianirangko dakjringenga aro songbadrango seani ja·man, department-ni manderang nirok sandianirangko baridapataha,” ineba Forest official-rang parakataha.