TURA: Re·anggipa Sombar salo, a·dokni skanggipa State University, Capt Williamson Sangma State University-ko Balalgre songo a·bachengate on·angani somoio Garoland State Movement Committee (GSMC)-ni dilgiparang, a·dokni Chief Minister Conrad K Sangma, Education Minister Rakkam A Sangma aro Higher & Technical Education-ni official AC Marak-ko grongenba, ia gital University-o Science, Commerce aro Arts stream-ni mongsonggipa department-rangko kulichina didiangaha.
GSMC-ni u·iatani gitade, ia State University-o Science stream-ni mongsonggipa department-rang, jekai Artificial Intelligence, Robotics, Drone Technology, Nuclear Science, Advanced Biology, Advanced Chemistry baksana Physics, Biology, Chemistry, Zoology aro Environmental Science department-rangko kulichina uamang, a·dokni Chief Minister aro gipin dilgiparangko didiataha,
Commerce stream-ni dingtang dingtang department-rangko kulichina didiatskaengon, Auditing, Business Law, Finance, Cost Accounting, Business Management, Economic Development, Financial Accounting gita dakgipa department-rangko kulichina GSMC didiangaha ine u·iataha.
Garo Hills-o bang·bata chatro chatrirangan Arts stream-ko ra·battokani gimin Arts stream-ni mongsonggipa department-rang, jekai Garo Language and Literature, Arts and Culture, Tourism Studies, Sociology and Anthropology, Social Work, Music and Performing Arts, Education and Teacher Training, English Language and Literature, History and Peace Studies, Psychology, Library and Information Science, Geology aro Geographical Information Systems gita dakgipa department-rangko kulichina GSMC didiataha.
Ia Captain Williamson Sangma State University-na kam ka·giparangko rakkianio, skanggipa joltangni candidate-rangnan cholko on·china gitaba GSMC-ni dilgiparang, a·dok sorkariko didiataha.
Ia gital kuligipa State University-o Law department-ko a·bachengatchina gitaba GSMC, a·dok sorkariko didiataha.
