TURA: Budbar salo, Union Labour & Employment aro Micro Small & Medium Enterprises (MSME) Minister Shobha Karandlaje, South Garo Hills a·jaona re·angenba, Commerce & Industries, Labour Department, Education, Tourism, Skill Development, State Roads & NH, Health Department, Social Welfare, BAD, Agri-Horticulture Department, PHE aro uandakgipa department-rangni ning·o ma·mong sorkarini ra·gatgipa scheme-rangko nipilna gita dingtang dingtang department-rang baksa Baghmara-ni gital Circuit House Conference Hall-o ong·atangaha.
Ia tom·anio, dingtang dingtang scheme-rangko chu·sokatanio chagrongna nangenggipa neng·nikanirangko Union Minister knatime ra·angaha aro kamrangko chu·sokatanio dakna nanggnirangkoba dingtang dingtang department-ni officer-rangna agan-ku·pattie on·angaha.
South Garo Hills a·jao ma·mong sorkarini scheme-rangko chu·sokatani bidingo sing·sandie ra·angengon, maikai kamrangko namdapatna man·gen, uarangni bidingo a·jani official-rangna Union Minister, agan-ku·pattianirangkoba on·angaha.
Ma·mong sorkarini ra·gate on·gipa dingtang dingtang scheme aro programrangni bidingo manderangna u·iatanirangko on·na nangengani gimin janapangengon, Aadhar, E-shram, NCS aro uandakgipa dingtang dingtang program-rango register ka·na nangani giminba Union Minister, agan-talatanirangko on·angaha.
South Garo Hills a·jao namroro silroroaniko ra·bana gita ku·cholsan ong·e kam ka·china didianiko on·angengon, Prime Minister Narendra Modi-ni niksamsoenga gita 2047 bilsini gisepo Vikshit Bharat-ko ong·atna krenge kamrangko ka·china Karandlaje ku·pattiangaha.
India a·songni pilak biaprangon darangkoba watchangani gri namroro silroroaniko ra·bana ma·mong sorkari kam ka·enga ine ua aganaha.
Tom·a matchotani ja·man Union Minister, South Garo Hills a·jani Anganwadi Centre-ko niangaha aro ICDS, PMEGP scheme, Labour, MSRLS aro uandakgipa program-ni namgniko man·enggipa manderang baksa agangrikangaha.
