TURA: Rekonanggre songo Jal Jeevan Mission (JJM)-na chamatgipa tangka paisarangko jakkalsretani a·sel ia songo JJM-ni kamrang matchotja ine A·chik Conscious Holistically Integrated Krima (ACHIK) Sangknigre regional unit, ia kamko jako ra·e kam ka·gipa contractor-rang aro official-rangni kosako Sangknigre police station-o FIR ka·doangaha.
ACHIK Sangknigre regional unit-ni president Mansrang Ch Marak-ni FIR-o parakani gitade, Rekonanggre songo JJM-ni kamrangna gimik 74,07,540 tangkarangko chame on·ahachim indiba ia tangkarangko jakkalsretahani a·sel kamrang chu·sokgipa ong·jaha.
Rekonanggre JJM scheme-ni ning·o Zonal Reservoir-ko kadulna chamgipa tangkarangni bidingo janapatengon, “Zonal reservoir-ko kadulna gita gong 9,32,150 tangkarangko chamahachim aro uamangni RTI-na aganchakanio kamrang matchotaha ine janapahaoba ia zonal reservoir-ko kadulanirang dongjachim,” ine ACHIK Sangknigre regional unit-ni president parakataha.
RCC Ringwell-ko rikani bidingo janapatskaengon, “Detailed Project Report (DPR)-ni gitade, RCC Ringwell-ko metre 12 tu·e rikna nangachim indiba ringwell-ko metre 3-mangmangsan tu·e rikaiahani a·sel songgimikna chirang chu·ongjaenga. Ian ia kamo tangka jakkalsretaniko mesokani ong·a,” ine Marak parakataha.
ACHIK Sangknigre regional unit-ni parakatani gitade, ia biapona rama tarina gitaba gong 94,200 tangkarangko chamahachim indiba ia biapona rama tarigipaba dongja.
“Iandakgipa kamrangara, tangka paisa jakkalsretaniko mesokanisan ong·ja indiba manderangni namgnina sorkarini on·gipa cholrangko nisie galaniba ong·a,” ine ACHIK Sangknigre regional unit-ni president parakatenba, ia kamo jak donggipa manderangni kosako rakgipa ja·kurangko de·china Sangknigre Police Station-ni officer-in-charge-ko didiataha.
