TURA: West Garo Hills a·jani Dobasipara police station-ni ning·o donggipa Diagre songo niam gri chalaienggipa saw mill ba bol ratani karkanako Bristibar salo, State Forest department-ni manderang chipe donataha aro ia karkanao bolrangko ratna jakkalenggipa dingtang dingtang bosturangkoba rim·aha.
Ia biapo niam gri saw mill chalaianiko GSU-CEC aro A·chik National Youth Organisation (ANYO)-ni membor-rang u·iatani ja·man, ia saw mill-ko State Forest department-ni manderang chipe donatna man·aha.
Ia saw mill-ko chadrapeanio, dot 140 gantongrangko salbaenggipa ML-08G 7055 Mahindra pik-up gari baksana ia garini driver-koba rim·na man·aha.
Ia saw mill-o bol ratna jakkalenggipa dingtang dingtang ostrorangna agreba, ia karkanao donggipa adita bolrangkoba Forest official-rang rim·e ra·angna man·aha.
