TURA: Gnigipa Meghalaya State Level Committee tom·anio tik ka·gimin gita Mongolbar salo, West Garo Hills a·jani dingtang dingtang department aro institute-rangna Bureau of Indian Standards (BIS)-ni bidingo agan-talatanirangko on·na gita Sensitisation aro Awareness program-ko Tura-ni DRDA Conference Hall-o ong·atangaha.
Ia program-ko ong·atanio, Guwahati BIS-ni Scientist C, Ashutosh Rai, jinma aganprakangengon, BIS-ni miksongani aro niamrangko talate on·angenba, ia BIS-ara, Consumers Affairs Ministry-ni ning·o donggipa National Standard Body ong·e, dingtang dingtang bosturangko tarianio niamrangko dongipa ong·a ine parakataha.
Cement, paver block, helmet aro uandakgipa bosturangni gadangko ia BIS-an see on·gipa ong·a ine janapatengon, dingtang dingtang sorkari department-rangba BIS-ni certify ka·gimin bosturangko an·tangtangni department-rangna ra·na man·a ine Rai aganaha.
BIS-ni certifiy ka·anichi manderang, bostuni nama namgijani, ka·dongna man·a man·gijani aro naljokgniko ma·sie ra·na man·a ineba ua aganaha.
Ia tom·anio BIS-ni SPO Jishnu Das-ba jinmana aganprakengon, BIS-ni kamrangko agan-talate on·angskaaha.
Ia program-ko ong·atanio dongpae bak ra·anggipa gipin manderangara, Tura FCS & CA-ni Joint Director NM Marak, Tura FCS & CA-ni Superintendent JK Marak, dingtang dingtang department-ni official-rang aro gipinrang ong·a.
