National Games-o medal man·giparangna sorkari kamko on·a CM ka·dongata

SHILLONG: 2027 bilsio 39-gipa National Games-na tarisamsoanio re·baenggipa bilsignio sports infrastructure-ko a·dok namdapatgen ine Chief Minister Conrad K. Sangma mejalo parakataha. Games-ko Khasi, Jainti aro Garo Hills gimikon soka chakgen aro uno medal man·gipa athlete-rangna sorkari kamko on·a gitaba ka·dongataha.
Meghalaya Sports Policy-o sorkarini ku·rachakani donga jeon National Games-ni medalrangko man·a uamangna sorkari kamrangko on·a ka·dongani donga, ua janaptaiaha.
Ua 2027-ni games-na namedake tarichina aro medal-rangko man·a jotton ka·china maina uamangna sorkari kamko on·gen ua a·dokni athlete-rangko didiaha.
Nambate ranta ka·china aro susana chadamberangko didie, uamangni mikkangchiniko sorkari simsakgen, ua ka·dongataha.
Ian itihaso chu·sokanina rasong chaaniko janape, National Games-ko sokna Meghalaya-na ian aiao inmanpilani ong·a, indiba da·alo Indian Olympic Association aro India soekari kal·susaani a·bako nambatatna a·dokni nimsaksoanio uamangni ka·donganiko donaha ine ua aganaha.
NPP-chi dilenggipa sorkari chasong gitalni sports infrastructure-rangko rike sports-ni a·bako mangrakbatatna aro athlete-rangna nama gadangni training-ko on·a ku·rachakaha, Sangma aganaha.
Sports-ni namgnirangko Shillong, Jowai aro Tura-osan donaigija songadam-nokadam a·jolrangoba namdapatgen, ua ka·dongataha.
A·songni gadango chadambe athlete-rangko tang·doatna nangchongmotgipa dakchakaniko on·a sorkari on·kangaha, ua aganaha.
Ong·nasienggipa National Games Meghalaya-nasan dal·begipa susaani ong·aija indiba salgro-salaram a·jol gimiknan ong·a. Meghalaya mongsonggipa soka chakgipa ong·e kamko ka·gen, Kragipa bewalo soka chakani daitoko Assam aro salgro-salaramni gipin a·dokrang baksa bakrimna dingtang dingtang miksonganiko infrastructure-o neng·nikaniko Chief Minister agan-talataha.
Meja Sukrobar-o Union Home Minister Amit Shah official-ni gita Indian Olympic Association flag-ko Chief Minister Sangma-na pawakataha, Meghalaya-ni official-ni gita 2027 National Games-ko a·bachenge soka chakna donatako man·aha.