Manderangni neng·nikanirangko namatna man·gipa dilgipakosa seokchina CM didia

SHILLONG: India aro Bangladesh a·songni simarango songdongenggipa manderangni neng·nikanirangko namatna man·gipa dilgipakosa seokchina a·dokni Chief Minister aro National People’s Party (NPP)-ni national president Conrad K Sangma, Shella constituency-ni manderangko didiangaha.
“Da·o ong·atna sienggipa KHADC election-ara Shella constituency-ni manderangna, an·tangtangni neng·nikanirangko ku·rang on·na man·gipa aro sorkarina u·iattimgipa dilgipako seokna namgipa chol ong·enga. Shella constituency-ni MDC, council-osan uamangni dilgipa ong·aijawa indiba Shella constituency-ni manderangko, sorkari baksa bak ong·atna cholko man·gen,” ine Shella constituency-ni Dalia songo, NPP-ni candidate-rangna campaign ka·engmiting somoio Sangma aganaha.
KHADC election-o NPP-ni candidate-rangko seokchina manderangko didiangengon, “Simarango manderangni chagrongna nangenggipa dingtang dingtang neng·nikanirangko namatna gita an·chingna namgipa dilgipako nanga, jean an·chingni neng·nikanirangko ma·sie namatna man·gen. Uni gimin ia KHADC election-o an·ching, NPP-ni candidate-ko seokna cholko ra·na,” ine NPP-ni national president aganaha.
Shella-oni Sohra-ona rama tarina ku·rachake an·tangni chu·sokatanikoba ua, Shella constituency-ni manderangna gisik ra·atpilaniko on·angaha. Shella-ni manderangna aro Meghalaya a·dokni simarango songdongenggipa gipin manderangna sorkarini on·enggipa dakchakanirangkoba ua janapangaha.
“NPP-de pilak biaprangon namroro silroroaniko on·aniosa bebera·a. Chinga a·dokni manderangna, dingtang dingtang namroro silroroani program-rangko a·bachengate on·na ku·rachakaha aro a·dokni dal·roroaniara manderangni an·seng baljokaniosa pangchakbata. Chingni party, game ge·e cha·giparang, chadamberang aro me·chikrangni janggi tangani gadangko namdapatna gita dingtang dingtang program-rangkoba ra·gate on·aha,” ine Chief Minister aganaha.
NPP-chi dilenggipa a·dok sorkarini kosako dingtang dingtang opposition dolrangni matnanganirangko janapatengon, ia dolrang a·dok sorkariko matnanggenchimoba, dingtang dingtang neng·nikanirangko namatanio ba namroro silroroani kamrangoba NPP-chi dilenggipa sorkarini dakchakanirangkon nangaia ine Sangma parakataha.
“Uni gimin chingni kosako matnange agangipa political dolrangna kenna nangja. Chingasa sorkariko chalaienga aro election-ni ja·mande pilak dolrangan, an·tangtangni neng·nikanirangko namatna NPP-on pangchaktaina nangaigen. Ia election-o na·simang an·tangtangni vote-rangchi uamangna aganchakaniko on·skabo,” ine NPP-ni national president, Shella constituency-ni manderangko didiataha.