AMPATI: Cashew ge·aniko nambatatna gita Mongolbar salo dingtangmancha training program-ko, South West Garo Hills a·jani Ampati Circuit House-o ong·atangaha.
Ia training program-ko CAU (Imphal)-ni ning·o donggipa College of Community Science (CCS)-ni Multi Technology Testing Centre & Vocational Training Centre, ICAR-Directorate of Cashew Research-ni dakchakanichi ong·atangaha aro ia program-ko ong·atanio, South West Garo Hills a·jani C&RD Block dambrio cashew bagan dake cha·enggipa sak 50 manderang bak ra·angtokaha.
Ia training program-ko ong·atanio, South West Garo Hills a·jani Deputy Commissioner Hema Nayak, mongsonggipa sokgipa ong·e bak ra·angaha aro tom·anio, Puttur-ni Principal Scientist Dr TN Ravi Prasad, Tura CCS-ni Dean Dr Jyoti V Vastrad baksana dingtang dingtang department-ni official-rangba bak ra·angtokaha.
Cashew-ko ge·anio, gitalbatsranggipa Science-ni bewalrang aro dingtang dingtang kamrangni bidingo game ge·e cha·giparangna skie on·na gita ia training program-ko ong·ataha.
Ia program-ko ong·atanio, cashew bagan dake cha·enggiparangna technical bulletin-rangko aro gama ge·anio jakkalgipa dingtang dingtang bosturangkoba suale on·angjolaha.
