SHILLONG: Congress dolna kamko ka·enggipa bang·bata manderangan aro a·dokni manderangba National People’s Party (NPP) baksa bakrime kam ka·aniko nangniktokjaengani gimin election-ni ja·man Khasi Hills Autonomous District Council (KHADC)-o NPP baksa kamrangko ka·rimjawaha ine Sukrobar salo, Meghalaya Pradesh Congress Committee (MPCC)-ni working president Pynshngain N Syiem parakataha.
“Bang·bata manderangan nangniktokjaengani gimin chinga NPP baksa kam ka·rimna nangnikjaenga,” ine Syiem, jean KHADC-o NPP-chi dilanggipa Executive Committee-ni gitcham Deputy CEM-ba ong·achim aganaha.
KHADC-o bilrang chu·ongjae, dolgittam ba dolbri political dolrang bakrime kamko ka·na nanggenchimode uamang chanchipiltaigen ineba ua aganskaaha.
“Re·baenggipa February 24 tariko district council election-ni result-rango pangchakesa ia pilakni bidingon chinga chanchitaina nanggen,” ine MPCC-ni working president aganaha.
Ia KHADC election-o Syiem, Mawkhar-Pynthorumkhrah constituency-oni Congress candidate ong·e susaahachim aro uni aganani gitade, ia constituency-o VPP ba UDP-ba una maming kenchakna nanganirang dongjaengachim.
“A·paloni nikna man·ani gitade, ia constituency-o VPP-na ba UDP-na balwa nama ine aganna man·jawa. Indiba sriksrik ia party-rangna chake pu·ongiparangni giminsa anga ma·sija,” ine KHADC-ni gitcham Deputy CEM aganaha.
KHADC-o ua CEM ong·piltaina ka·dongengama ine sing·anina aganchakaniko on·angskaengon, ia pilakan Congress dol badita seat-rangko chegen unosa pangchakaigen ine Syiem aganaha.
“Chinga bang·bate seat-rangko chea ong·ode anga CEM ong·piltaiani cholrangba dongaia indiba bang·gija seat-rangkosan cheaia ong·ode CEM ong·piltaiani katta dongjawa,” ine ua aganaha.
