SHILLONG: Sukrobar salo, Jaintia Hills Autonomous District Council (JHADC) election-ko ong·atanio, East Jaintia Hills a·jani constituency damgnini ning·o donggipa polling station-rango, manderang jinma Electronic Voting Machine (EVM)-rangko nosto ka·e galahani gimin ia polling station dambrion pu·onpiltaianiko ong·atchina District Council Affair (DCA) department ge·etaniko on·angaha.
Pu·onpiltaina nangenggipa polling station dambriara, Musniang-Rangad constituency-ni ning·o donggipa Wapung Skur A, Wapung Skur B aro Bataw-Lakadong constituency-ni ning·o donggipa Bataw A aro Bataw B ong·enga.
Ia election-ko ong·piltaina nangengani gimin DCA department-ni Commissioner & Secretary Cyril Diengdoh, kobor ra·timgiparangna talate on·angengon, election-ko Sonibar salo, chel·chakanirang baksa pring 7:00 bajioni attam 4:00 bajiona ong·atanggen ine parakataha.
“East Jaintia Hills a·jao JHADC-ni constituency damgnini ning·o donggipa polling station dambrio badiaba dolni manderang, EVM-rangko nosto ka·e galahani gimin ia polling station dambrion pu·onatpiltaichina DCA department ge·etaniko on·aha aro election-ko Sonibar pring 7 bajioni attam 4 bajiona ong·atanggen,” ine Diengdoh aganaha.
Ia polling station-rango manderangni jinma EVM-rangko nosto ka·ani bidingo sandirokna nangkuenga ineba ua aganaha.
“EVM-rangko nosto ka·ahani gimin 143 B-ni ning·o chinga election-ko ong·attaina nangaha,” ine Diengdoh aganaha.
Election official-ni parakatani gitade, ia a·sel ong·ani somoio chel·chakgipa sipai dolrang, polling station-o dongachim indiba manderang jinma napdraahani gimin champengna gita man·jaha.
Iani bidingo East Jaintia Hills a·jani Deputy Commissioner, nanga gita ja·kurangko de·anggen ineba ua aganaha.
