SHILLONG: Bharatiya Janata Party (BJP)-chi dilenggipa NDA sorkarini somoio Meghalaya a·dokna tangka paisani gita dakchake on·ani aro kajinako sualgrikani bariangaha ine External Affairs-ni Union Minister of State Pabitra Margherita parakataha.
Iani bidingo kobor ra·timgipa manderang baksa agangrikengon, ia sorkarini ning·o Meghalaya a·dok aro salgro salaram jol gimikan mongsonggipa gadang gita ong·aha ineba ua aganaha.
Meghalaya aro salgro salaramni gipin biaprangona a·songni Prime Minister Narendra Modi an·tangan chang 65 batpile re·baaha ineba Margherita aganaha.
MoS-ni aganani gitade, 2014 bilsina skangde Meghalaya a·dokna grants-in-aid gong kror 19,700-san ong·aiachim indiba BJP sorkarini somoiode gong kror 40,452 ong·e, 105 percent-chi bariangaha.
“Tax devolution-o gong kror 7273-oni gong kror 48,883-ona tang·doangahani gimin 572 percent-chi bariaha,” ine ua aganaha.
Pilak kamrangon Meghalaya namroro silrorona man·engaha ine janapatengon, ma·mong sorkarini pilak scheme aro project-rangon Meghalaya a·dok bang·en tangka paisarangko man·enga ine Minister of State parakataha.
“PM-DevINE scheme-ni ning·o, New Shillong Township-o four-lane ramako tarina, Mawkdok-o Skywalk aro tourist hub-ko rikna aro Tura-oba IT Park-ko tarina ra·chakmanaha. 2014 bilsini April ja intan Meghalaya a·doko kilometre 540 ong·gipa National Highway-ko tariaha,” ine Margherita aganaha.
North East Special Infrastructure Development Scheme (NESIDS)-ni bidingo janapatskaengon, NESIDS-ni ning·o dingtang dingtang project-rangko Meghalaya a·dokna ra·chakaha aro ia project-rangoni mitamranga, gong kror 459-ni dil 7 rama jal·langrang, kror 1,737-ni ming 116 project-rag, UDAN-ni ning·o Shillong Airport-ko dal·batatani aro gipinrang ong·a ine MoS aganaha.
Margherita-ni aganani gitade, 2024-25 bilsio dingtang dingtang a·dokrangna capital investment-ni special assistance-ko on·anio Meghalaya a·dok, gong kror 1300-mang ong·na sipile tangka paisarangko man·aha.
2025-26 bilsini Union Budget-ni mongsonggipa bakrangko janapatengon, “India-ko Viksit Bharat ong·atanio Meghalaya a·dokko Viksit Meghalaya ong·atna gita mongsonggipa engine ge·bri donga aro ian songadam nokadamrangni namroro silroroanina gama ge·aniko tang·doatani, bading chiwalgiparangna MSME aro kamrangko nakatate on·anian ong·enga,” ine MoS aganaha.
“Uni gimin jeon tangka paisarangko chamaha, ua pilak kamrangon Meghalaya a·dok namgnirangko man·gen,” ine ua aganaha.
Medical college-rango dam 75,000 seat-rangko on·dapgen ineba External Affairs-ni Union MoS parakataha.
 |
ReplyForward
|
